ریپبلک ٹی وی کے سی ایف او ممبئی پولیس کے سامنے حاضر نہیں ہوئے

ٹی آر پی بدعنوانی معاملے میں ممبئی کرائم برانچ کی جانب سے تفشیش کے لیے طلب گئے ریپبلک میڈیا نیٹ ورک کے چیف فائنانشیل آفیسر (سی ایف او) شیو سُندرم پولیس کے سامنے حاضر نہیں ہوئے۔

شیو سُندرم نے پولیس کے سامنے حاضر نہ ہونے کا جواز پیش کیا کہ اس سلسلے میں سپریم کورٹ میں ایک عرضداشت داخل کی گئی ہے اور اس کی سماعت زیر التوا ہے نیز اس کا فیصلہ آنے کے بعد یا پھر عدالت کے احکامات کے بعد ہی وہ تفشیش کے لیےحاضر ہوں گے۔

واضح رہے کہ اس سے قبل ممبئی پولیس نے ٹیلی ویژن ریٹنگ پوائنٹس (ٹی آر پی) میں ہیرا پھیری کے سلسلے میں سُندرم کو تفشیش کے لیے حاضر ہونے کے لیے سمن جاری کیا تھا۔

ممبئی کرائم برانچ کا کرائم انٹیلی جنس یونٹ (سی آئی یو) جعلی ٹی آر پی ریکیٹ کی تحقیقات کر رہا ہے جبکہ محصولاتی پہلو کی چھان بین کے لیے ممبئی پولیس کا اکونامک آفینسس ونگ (ای او ڈبلیو) بھی تحقیقات میں شامل ہو گیا ہے۔