'نہ جانے کتنے سوالوں کی آبرو رکھ لی'

کانپور سانحہ کے کلیدی ملزم وکاس دوبے کی جمعہ کو پولیس کے ساتھ انکاؤنٹر میں موت پر حزب اختلاف کے رہنماؤں نے سوالات اٹھائے ہیں۔ کانگریس کے رہنما راہل گاندھی نے بھی اس انکاؤنٹر کے تعلق سے حکومت پر سخت نکتہ چینی کی ہے۔

کانگریس کے سابق صدر راہل گاندھی نے ٹویٹ کیا کہ 'کئی جوابوں سے اچھی ہے خاموشی اس کی

نہ جانے کتنے سوالوں کی آبرو رکھ لی۔'

ٹویٹ

راہل گاندھی نے ٹویٹ میں حالانکہ انکاؤنٹر کا ذکر تو نہیں کیا ہے لیکن ان کا یہ شعر انکاؤنٹر کی جانب ہی اشارہ کر رہا ہے۔

غور طلب ہے کہ وکاس دوبے کے انکاؤنٹر کے بعد حزب اختلاف کے رہنماؤں نے اس انکاؤنٹر پر کئی سوالیہ نشان اٹھائے ہیں۔

کانگریس جنرل سکریٹری پرینکا گاندھی نے بھی انکاؤنٹر کو لے کر ٹویٹ کیا کہ 'مجرم کا خاتمہ ہو گیا، کرائم اور اس کو پناہ دینے والے لوگوں کا کیا؟'

غور طلب ہے کہ اترپردیش پولیس کے آٹھ اہلکاروں کو بے رحمی سے قتل کرنے والے کلیدی ملزم وکاس دوبے کو پولیس نے انکاؤنٹر میں ہلاک کر دیا۔

پولیس کے مطابق یوپی ایس ٹی ایف کی گاڑی وکاس کو لے کر کانپور آرہی تھی۔ اسپیڈ تیز تھی۔ اکبر پور بارہ کے پاس اچانک راستے میں گاڑی پلٹ گئی۔ اس حادثہ میں وکاس دوبے اور سپاہی کو چوٹیں آئیں، پولیس کے مطابق وکاس دوبے زخمی ایس ٹی ایف کے ایک افسر کی پستول چھین کر فرار ہونے کی کوشش کی تھی۔ اس دوران انکاؤنٹر میں وکاس دوبے ہلاک ہوگیا۔