کانگریس کے سابق صدر راہل گاندھی نے اسمبلی انتخابات میں دوسرے مرحلے کی ووٹنگ میں بہار کے ووٹروں سے پسند کی نئی حکومت کا چناؤ کرنے کے لئے لازمی طورپر ووٹنگ کرنے کی اپیل کی ہے۔
راہل گاندھی نے منگل کی صبح ٹویٹ کیا کہ ’’آج بہار کے کچھ اضلاع میں ووٹنگ کا دوسرا مرحلہ ہے۔ ووٹ ضرور کریں تاکہ آپ کی پسند کی نئی حکومت بنے۔‘‘
انہوں نے بہار میں انتخابی تشہیر کے اپنے پروگرام کی بھی معلومات دی اور لکھا کہ ’’آج آپ سب سے ملنے بہار کے کوڑھا اور کشن گنج آرہا ہوں۔ بڑھتی بے روزگاری، کسانوں پر آفات، کمزور معیشت جیسے کئی مسائل پر بات ہوگی۔‘‘
واضح رہے کہ بہار میں دوسرے مرحلے میں 17 ضلعوں کی 94 سیٹوں پر آج ووٹنگ جاری ہے۔ پہلے مرحلے میں 28 اکتوبر کو 16 اضلاع کی 71 سیٹوں پر ووٹنگ ہوئی تھی اور آخری مرحلے میں سات نومبر کو باقی 78 سیٹوں کےلئے ووٹ ڈالے جائیں گے اور دس نومبر کو ووٹوں کی گنتی ہوگی۔