'اقوام متحدہ میں نسل پرستی پر بحث کی جائے'

اقوام متحدہ میں مغربی افریقی ملک برکینا فاسو کے سفیر نے اس سلسلے میں کونسل کو ایک خط پیش کیا ہے جو 54 افریقی ممالک کی جانب سے لکھا گیا ہے۔

براعظم افریقہ میں واقع مختلف ممالک نے اقوام متحدہ کی انسانی حقوق کونسل پر زور دیا ہے کہ افریقی نژاد باشندوں کے خلاف نسل پرستانہ رویوں اور پولیس کی ظالمانہ کارروائیوں پر بحث کی جائے۔

اقوام متحدہ میں مغربی افریقی ملک برکینا فاسو کے سفیر نے اس سلسلے میں کونسل کو ایک خط پیش کیا ہے جو 54 افریقی ممالک کی جانب سے لکھا گیا ہے۔

اس خط میں رنگ اور نسل کی بنیاد پر انسانی حقوق کی خلاف ورزیوں، پولیس کی ظالمانہ کارروائیوں اور نا انصافیوں کی مخالفت میں آواز اٹھانے والے مظاہرین کے خلاف طاقت کے استعمال جیسے مسائل پر فوری بحث کا مطالبہ کیا گیا ہے۔

یہ خط عالمی ادارے کی انسانی حقوق کونسل کی صدر کے نام لکھا گیا ہے اور اس میں اگلے ہفتے کونسل کے ایک اجلاس میں بحث کا مطالبہ بھی کیا گیا ہے۔

دوسری جانب سیاہ فاموں کے خلاف پولیس گردی اور نسلی امتیاز کے خلاف ہفتے کے روز برطانیہ کے دارالحکومت لندن سمیت کئی شہروں میں مظاہرے کیے گئے۔

اس دوران وسط لندن میں سفید نام نسل پرست بھی سڑکوں پر نکل آئے، جس کے باعث صورت حال انتہائی کشیدہ ہوگئی۔