'کورونا کو روکنے مناسب اقدامات کیے گئے'

پنجاب نے دعوی کیا کہ کووڈ-19 سے نمٹنے میں وہ ملک کی دیگر ریاستوں سے آگے ہے۔

ریاست پنجاب کے صحت اور خاندانی بہبود کے وزیر بلبیر سنگھ سدھو نے ربو اونچی گاوں میں بابا مہاراج سنگھ کے شہیدی دیوس پر منعقدہ ریاستی سطح کے پروگرام کے بعد صحافیوں سے بات چیت کے دوران کہا کہ پنجاب کووڈ-19 سے نمٹنے میں ملک کی دیگر ریاستوں سے آگے ہے۔۔

انہوں نے کہا کہ وزیراعلیٰ کیپٹن امریندر سنگھ کی قیادت والی ریاستی حکومت کی جانب سے کووڈ19 کو پھیلنے سے روکنے کے لئے وقت پر کیے گئے مناسب اقدامات کے سبب پنجاب کورونا وائرس کی مار سے بچ گیا ہے۔

بلبیر سنگھ سدھو نے کہا کہ وبا سے لوگوں کو بچانے کے لئے ریاست میں ٹیسٹ اور علاج کا پورا بندوبست کیا گیا ہے تاکہ نجی اسپتالوں پر لوگوں کو منحصر نہ رہنا پڑے۔ ریاست میں ہر روز دس ہزار سے زائد ٹیسٹ کئے جارہے ہیں۔ امرتسر کی ایک لیب کی طرف سے جھوٹی پازیٹیو رپورٹ دینے کے بارے میں انہوں نے کہا کہ محکمہ کی طرف سے اس لیب کا لائسنس منسوخ کردیا گیا ہے۔