بھاگلپور: شہریت ترمیمی قانون کے خلاف عوامی جلسہ

مرکزی وزیر اور آرہ کے رکن پارلیمنٹ اشونی کمار کے آبائی وطن بھاگلپور کے دریاپور گاؤں میں شہریت ترمیمی قانون کے خلاف ایک عوامی میٹنگ ہوئی جس میں سنیچر کو منعقد ہونے والی کانفرنس کی تیاریوں کے سلسلے میں بات چیت کی گئی۔

اس موقع پر میٹنگ سے خطاب کرتے ہو ئے بنکر لیڈر حاجی علیم انصاری نے کہا کہ یہ کالا قانون ملک کے لئے نقصاندہ ثابت ہوگا اس سے آپسی بھائی چارہ، اتحاد و محبت کو زبردست نقصان پہنچے گا۔ انہوں نے کہا کہ جب تک اس کو واپس نہیں لیا جا تا تب تک یہ تحریک جا ری رہے گی۔

انہوں نے کہا کہ ہم بھارت کے باشندہ ہیں اور یہیں پلے بڑھے ہیں اور یہی رہیں گے اور یہیں مریں گے۔ اس موقع پر للن پاسوان نے کہا کہ جب ووٹ لینے کا وقت ہوتا ہے تو ہم لوگ ایس سی، ایس ٹی، دلت ہندو ہو جاتے ہیں اور جب ہم براہمنوں کے گھر جاتے ہیں تو ان کا گھر ناپاک ہو جا تاہے۔

مندر جاتے ہیں تو مندر ناپاک ہو جا تا ہے ابھی رام مندر ٹرسٹ بنا تو ہم ہندو نہیں تھے،اسی لئے میں کہتا ہوں کہ ایس سی، ایس ٹی، او بی سی ہندو نہیں ہیں اگر رہتے توان لوگوں کے کہیں آنے جانے سے چھوا چھوت کا ناٹک نہیں کیا جا تا۔

اس موقع پر محمد عثمان ، حاجی امتیاز، مولانا عین الحق مظاہری، مولانا نثار وغیرہ نے بھی خطاب کیا۔ ان لوگوں نے دلت مسلم اتحاد پر زور دیا تاکہ حکومت کے خلاف مظاہروں کو مزید تقویت بخشی جائے۔ اس موقع پر چیرمین حاجی محمد انصاری، فرقان انصاری، عبید اللہ انصاری، راجو پاسوان وغیرہ موجود تھے۔