ریاست بہار کے ضلع کشن گنج میں سیمانچل سینا سنگٹھن کی جانب سے شہریت ترمیمی قانون اور قومی آبادی رجسٹر کے خلاف پرامن جلوس کا انعقاد کیا گیا، جس میں ہزاروں کی تعداد میں لوگ شریک ہوئے۔
اس احتجاجی جلسہ میں کشن گنج رکن پارلیمان ڈاکٹر جاوید آزاد،کوچادھامن رکن اسمبلی ماسٹر مجاہد عالم، جمعیت علماء ہند کوچادھامن کے صدر الحاج اظہار اصفی، ڈسٹرکٹ چئیرمین سرور عالم، پمی بیگم، نزہت پروین وغیرہ نے شرکت کی۔
این پی آر کے خلاف سپریم کورٹ جانے کی تیاری شروع اس جلسہ کے دوران دستخطی مہم بھی چلائی گئی جس میں تقریباً 2 ہزار لوگوں نے دستخط کئے، جلسے کے دوران اس بات کا بھی اعلان کیا گیا کہ آئندہ 29 جنوری کو قومی آبادی رجسٹر کے خلاف سپریم کورٹ میں پٹیشن دائر کی جائے گی۔
اس موقع پر اظہار اصفی نے کہا کہ سی اے اے اور این پی آر کے خلاف وہ پہلے ہی سپریم کورٹ میں پٹیشن دائر کر چکے ہیں،ضرورت پڑے گی تو وہ پھر سے کورٹ جانے کے لئے تیار ہیں۔
وہیں سرور عالم نے کہا کہ ریاست میں این پی آر کا کام شروع ہونے سے روکنا ہوگا اس کے لئے جے ڈی یو کے رکن اسمبلیوں کو پہل کرنی ہوگی، حکومت بہار پر دباؤ بنانا ہوگا۔
سرور عالم نے مزید کہا کہ اس سے قبل اگر کوئی آپ سے دستاویزات طلب کرتا ہے تو ہر گز آپ نہ دیں، بلکہ فوراً کسی تعلیم یافتہ شخص سے رابطہ کریں۔
مزید پڑھیں: شاہی خاندان سے جدائی پر ہیری نے شدید تکلیف کا اظہار کیا
وہیں جے ڈی یو رکن اسمبلی ماسٹر مجاہد عالم نے کہا کہ بھلے ہی ہماری حکومت کی جانب سے اس قانون کی حمایت میں ووٹنگ کی گئی ہو لیکن وہ بہار میں کسی بھی قیمت پر این آر سی نافذ ہونے نہیں دیں گے۔
رہی بات این پی آر کی تو اس کے تعلق سے بھی وزیر اعلیٰ نتیش کمار مشترکہ طور پر میٹنگ کے لئے تیار ہیں۔ این پی آر میں جو ترمیم کرنی ہوگی اس کے لئے بہار کے وزیر اعلیٰ نتیش کمار تیار ہیں۔
