'وزیر اعظم کے لداخ دورے سے فوجیوں کے حوصلے بلند ہوں گے'

مرکزی وزیر داخلہ امت شاہ نے آج وزیر اعظم نریندر مودی کے لداخ کے دورے کی تعریف کرتے ہوئے کہا کہ اس دورے سے ہمارے بہادر فوجیوں کے حوصلے بلند ہوں گے۔

مرکزی وزیر داخلہ امت شاہ نے وزیر اعظم نریندر مودی کے مشرقی لداخ کے محاذی علاقوں کے اچانک کے دورہ کی زبردست ستائش کرتے ہوئے کہا کہ ان کے دورے سے بہادر فوجیوں کی حوصلہ افزائی ہوگی اور انہیں تقویت ملے گی۔

ٹویٹ

انہوں نے کہا کہ وزیر اعظم کا یہ دورہ بھارتی فوج اور چین کے پی ایل اے (پیپلز لبریشن آرمی) کے مابین جاری تعطل کے بیچ اچانک عمل میں آیا ہے۔

لداخ کے گلوان وادی میں چین ۔ بھارت کے درمیان جھڑپ میں بھارتی فوج کے 20 جوانوں کی ہلاکت کے بعد سے دونوں ملکوں کے درمیان مسلسل حالات کشیدہ ہیں۔

امت شاہ نے فوجیوں کے ساتھ مودی کی متعدد تصاویر کے ساتھ ٹویٹ کیا ہے کہ مودی جی فوج، فضائیہ اور آئی ٹی بی پی کے بہادر جوانوں کے ساتھ محاذ پر قیادت کررہے ہیں۔

اسی پس منظر میں وزیر اعظم نریندر مودی آج صبح حقیقی کنٹرول لائن (ایل اے سی) پر چین کے ساتھ کشیدگی کے تناظر میں سرحدی سلامتی کی صورتحال کا جائزہ لینے کے لئے مرکزی علاقہ لداخ کےسرحدی شہر لیہہ پہنچ گئے۔

یہ پہلا موقع ہے جب 15 جون کو لداخ میں ہونے والے جھڑپ کے بعد سلامتی سے متعلق کابینی کمیٹی کے کسی رکن نے لداخ کا دورہ کیا ہے۔

وزیر اعظم کے لداخ کا یہ اہم دورہ ایسے وقت میں ہوا ہے، جب مشرقی لداخ میں ایل اے سی میں کشیدگی کو ختم کرنے کے لئے چینی فوج کے ساتھ بات چیت میں کوئی پیش رفت نہیں ہو رہی ہے۔

وزیراعظم کو آرمی، ایئر فورس اور آئی ٹی بی پی کی طرف سے نیمو کے محاذی مقام پر مشترکہ بریفنگ دی گئی۔ یہ جگہ سطح سمندر سے گیارہ ہزار فٹ بلندی پر واقع ہے۔

واضح رہے کہ چین کے ساتھ وادی میں پرتشدد مقابلے میں 20 بھارتی جوان ہلاک ہوگئے تھے۔