'حکومت اپنی ناکامی چھپانے کے لیے پی ایف آئی کی کہانی بنارہی ہے'

مرکزی وزیر داخلہ امت شاہ کے ذریعے دہلی فسادات کے تار پاپولر فرنٹ آف انڈیا (پی ایف آئی) سے جوڑے جانے پر دہلی اقلیتی کمیشن کے چیئرمین ڈاکٹر ظفرالاسلام خان نے سخت ناراضگی کا اظہار کیا ہے۔

ڈاکٹر ظفر الاسلام نے کہا ہے کہ یہ بڑے ہی شرم کی بات ہے کہ کہ ایک تو ان سے غلطی ہوئی کہ وہ لوگوں کو تحفظ نہیں فراہم کرپائے اور دہلی پولیس کی 80 ہزار فورس ہونے کے باوجود یہ سب ہوا۔

واضح رہے کہ شمال مشرقی دہلی کے کئی علاقوں میں فسادات پھوٹ پڑے تھے جس پر امت شاہ نے پارلیمان میں یہ بیان دیا تھا کہ دہلی میں فسادات باہر سے آئے لوگوں نے انجام دیے اور انھوں نے دہلی پولیس کی کارروائی کی تعریف بھی کی تھی۔

ڈاکٹر خان نے سوالیہ انداز میں کہا کہ دہلی پولیس اور امت شاہ کی مانیں تو مسلمانوں نے خود ہی اپنی دکانیں جلائیں، مکانات نذر آتش کی، خود ہی قتل کیے اور تباہ کیا، دراصل انھیں سب کمزوریوں کو چھپانے کے لیے پی ایف آئی کی کہانی بنائی جارہی ہے۔

ڈاکٹر خان نے کہا کہ انھیں یہ چاہیے تھا کہ وہ یہ معلوم کرتے کہ کس کی وجہ سے یہ سب ہوا اور اس میں کس کی غلطی ہے اور ان کے خلاف کارروائی کی جاتی لیکن ایسا کچھ نہیں ہوا، اب یہ باتیں بنائی جارہی ہیں کہ مسلمانوں نے خود ہی سب کچھ کرلیا اور اب پی ایف آئی جیسی تنظیموں کا نام لیا جارہا ہے۔

ڈاکٹر ظفرالاسلام کا یہ بھی کہنا ہے کہ ہمیں نہیں پتہ کی بھارت میں داعش کہاں سے آگیا اور پی ایف آئی میں اتنی طاقت کہاں سے آگئی کہ وہ فسادات رونما کرائے جس میں 53 افراد ہلاک اور سیکڑوں افراد زخمی ہوجائیں گے۔

انھوں نے واضح طور پر کہا ہے کہ حکومت اس طرح کی کہانیاں بنارہی ہے تاکہ وہ اپنی خامیوں اور کمزوریوں کو چھپاسکے۔