سینیئر افسر شلپی شندے ابھی نئی دہلی ضلع کی ڈی ایم ہیں۔ اب دہلی حکومت نے انہیں بیرونی ممالک سے آنے والے بھارتیوں کی جانچ اور ان کی اسکریننگ کرنے کی ذمہ داری سونپی ہے۔
دہلی حکومت کے محکمہ صحت کی سکریٹری پدمنی سنگلا نے حکم نامہ جاری کیا ہے کہ جو بھی مسافر بیرونی ممالک سے آئیں گے ان کو جانچ کے بعد پیڈ کوارنٹائین میں رکھا جائے گا۔ جتنے دنوں کے لیے کورنٹائن میں مسافر رہیں گے انہیں اس کا خرچ برداشت کرنا ہوگا۔ اس کے بعد ہی وہ اپنوں سے مل سکیں گے۔
دہلی ایئرپورٹ پر مسافر کے اترنے کے ساتھ ہی ان کی ہیلتھ اسکریننگ ہوگی۔ پھر امیگریشن کی جانچ کی جائے گی۔ سرکاری عمل پورے کرنے کے بعد ہی انہیں لوگوں سے ملنے دیا جائے گا۔ اگر یہ لوگ دوسری ریاستوں سے تعلق رکھتے ہیں تو انہیں اس ریاست کے افسران کے سپرد کیا جائے گا۔
خیال رہے کہ کورونا وائرس کے پیش نظر انفیکشن سے بچانے کے لیے ملک گیر لاک ڈاؤن کے دوران تمام بین الاقوامی پروازوں پر بندش لگا دی گئی تھی۔ ڈیڈھ ماہ سے بھی زیادہ وقت سے بہت سارے بھارتی ہیں جو دیگر ممالک میں پھنسے ہوئے تھے۔ وہ بھارت لوٹنا چاہتے تھے۔ اب یہ لوگ کل سے لوٹنا شروع کریں گے۔
