تریپورہ کے واحد کورونا ہسپتال میں آکسیجن سپلائی متاثر

سابق وزیر صحت اور بھارتیہ جنتا پارٹی کے ایم ایل اے سدیپ رائے ورمن ایک بائیو میڈیکل انجینئر کے ساتھ ہسپتال پہنچے اور آکسیجن سپلائی لائن کی مرمت کو دوبارہ شروع کرایا۔

تریپورہ میں کورونا وائرس سے ہونے والی اموات میں اچانک اضافے کی جانچ کے لئے مرکزی ٹیم کے دورہ کے دوران ریاست کے واحد کووڈ ہسپتال میں جمعہ کی رات آکسیجن سپلائی میں خلل پڑا، جس کے نتیجے میں 200 سے زائد زیر علاج مریضوں کی جان خطرے میں پڑ گئی۔

اس دوران ہسپتال میں داخل مریض کے گھر والوں کی جانب سے اس بحران کی اطلاع موصول ہونے کے بعد سابق وزیر صحت اور بھارتیہ جنتا پارٹی کے ایم ایل اے سدیپ رائے ورمن ایک بائیو میڈیکل انجینئر کے ساتھ ہسپتال پہنچے اور آکسیجن سپلائی لائن کی مرمت کو دوبارہ شروع کرایا۔ لیکن اس میں تقریباً ایک گھنٹہ لگ گیا۔

ہسپتال کے ذرائع نے بتایا کہ جمعہ کی رات گیارہ بجے ڈیوٹی پر موجود ڈاکٹروں نے دیکھا کہ کووڈ ٹریٹمنٹ سنٹر کے ایک خاص بلاک میں داخل مریضوں کو سانس لینے میں دشواری ہورہی ہے۔ ڈاکٹروں نے یہ اطلاع اسپتال انتظامیہ کو دی لیکن آدھی رات کے بعد ایک بجے تک کسی نے بھی اس معاملے میں مداخلت نہیں کی۔