'دہلی میں چار سے 15 نومبر تک طاق و جفت فارمولہ'

دارالحکومت دہلی کے وزیراعلی اروند کیجریوال نے جمعرات کے روز دار الحکومت میں فضائی آلودگی پر قابو پانے کے مقصد سے چار نومبر سے گاڑیوں کے لیے طاق اور جفت( آڈ۔ ایون) نظام نافذ کرنے کا اعلان کیا۔

وزیراعلی کیجریوال نے دہلی میں پریس کانفرنس میں کہا کہ یہ نظام 15 نومبر تک نافذ رہے گا اور دیگر ریاستوں سے آنے والی گاڑیوں پر بھی یہ پابندی عائد ہوگی۔ انہوں نے کہا کہ آڈ۔ ایون نجی چار پہیہ گاڑیوں پر نافذ ہوگی۔ دو پہیہ گاڑیوں کو اس سے مستثنی رکھا گیا ہے۔

وزیراعلی نے کہا کہ آڈ۔ ایون منصوبہ ہر صبح آٹھ بجے سے رات آٹھ بجے تک عمل میں رہے گا۔ اتوار کے روز یہ نظام نافذ نہیں ہوگا۔ آڈ۔ ایون کی خلاف ورزی کرنے والی چار پہیہ گاڑیوں پر 4000 روپے کا جرمانہ لگایا جائے گا۔

انہوں نے کہا کہ صدر، نائب صدر، وزیراعظم، گورنر، بھارت کے چیف جسٹس، لوک سبھا اسپیکر، مرکزی وزیر، راجیہ سبھا اور لوک سبھا میں حزب اختلاف کے لیڈر، ریاستوں کے وزرائے اعلی کو بھی اس منصوبے سے مستثنیٰ رکھا گیا ہے لیکن دہلی کے وزیراعلی اور وزیر اس کے دائرے میں آئیں گے۔

واضح رہے کہ آڈ۔ایون میں تاریخ کے مطابق آڈ اور ایون نمبر والی گاڑیوں کو ہی سڑک پر چلنے کی اجازت ہوگی۔