کورنٹائن کے سلسلے میں نرسنگ عملے کا احتجاج

راجستھان میں اجمیر ڈویژن کے سب سے بڑے جواہر لعل نہرو اسپتال میں کورونا مریضوں کے بیچ میں رہ کر ڈیوٹی کرنے والے نرسنگ عملے نے احتجاج کیا اور کورنٹائن کی سہولت مہیا کرانے کا مطالبہ کیا۔

اسپتال کا نرسنگ عملہ، سماجی فاصلہ پر عمل کرتے ہوئے جمع ہوا اور اسپتال سپرنٹنڈنٹ اور نرسنگ سپرنٹنڈنٹ کو ایک میمورنڈم سونپا جس میں کہا گیا ہے کہ اجمیر میں مسلسل کورونا وائرس کے معاملوں میں اضافہ ہو رہا ہے۔

ہم پوری ذمہ داری کے ساتھ کورونا بحران کے دوران ڈیوٹی کر رہے ہیں لیکن ڈیوٹی کے بعد اسپتال انتظامیہ ہمیں کورنٹائن کے بجائے سیدھے گھر بھیج رہا ہے۔ ایسے میں ہمارے کنبے سمیت رابطے میں آنے والے لوگ اور پڑوسیوں کے لیے خطرہ ہوسکتا ہے جس سے ہم خود کو غیرمحفوظ محسوس کر رہے ہیں۔

میمورنڈم میں کہا گیا ہے کہ ضابطے کے مطابق 14 روز کے کورنٹائن کی خلاف ورزی کرتے ہوئے انتظامیہ ہمیں ہمارے گھر بھیج رہا ہے۔ اگر ایسی پوزیشن میں ہم میں کورونا کی علامات ملتی ہیں اور ہمارے رابطے میں آنے والا کوئی متاثر ہوتا ہے تو اس کی پوری ذمہ داری انتظامیہ کی ہوگی۔