ملک میں گزشتہ چوبیس گھنٹوں میںکورونا وائرس (کووڈ 19)وبا کے 43 نئے معاملے سامنے آئے ہیں اورچار مریضوں کی موت ہونے کے ساتھ مرنے والوں کی تعداد بڑھ کر 13 ہوگئی ہے۔
ملک میں کرونا وائرس کے کُل پازیٹیو معاملوں کی تعداد بڑھ کر 649 ہوگئی ہے اور ان میں602 بھارتی شہری اور 47 غیر ملکی شہری ہیں۔
وزارت صحت میں جوائنٹ سکریٹری لو اگروال نے جمعرات کو نامہ نگاروں کی کانفرنس میں کرونا وبا کے بارے میں اطلاع دیتے ہوئے بتایا کہ حکومت کی توجہ کرونا وائرس مریضوں کے بہتر علاج، بیرون ملکوں سے آئے مریضوں کو کورنٹائن کرانے اور ان کے رابطہ میں آئے لوگوں کی نگرانی کرنا ہے اور اس کے بہترنتائج بھی ملنے شروع ہوگئے ہیں۔
انہوں نے بتایا کہ مرکزی حکومت کی درخواست پر مختلف ریاستوں نے خاص طور سے کرونا وائرس کے لئے اسپتال بنانے کا کام شروع کردیا ہے اوراب تک کروناوائرس کے علاج کے لئے سترہ ریاستوں میں اسپتالوں کا کام شروع کردیا گیا ہے۔
انہوں نے بتایا کہ اس بیماری سے بچاؤ کے لئے ،سوشل ڈسٹنسنگ، بہت اچھا قدم ثابت ہوسکتا ہے اور اگر لاک ڈاؤن کے دوران اس کی پوری طرح سے پیروی کرلی جاتی ہے تو اس بیماری کے وائرس کے پھیلنے کے چین کو کافی حد تک قابو میں کیا جاسکتا ہے۔
اگروال نے بتایا کہ حالانکہ کورونا وائرس کے کافی معاملے سامنے آرہے ہیں لیکن ان کا رجحان دیکھا جائے تو اس میں کمی محسوس کی جاسکتی ہے اوراس کی رفتار کو دیکھتے ہوئے تھوڑا اطمینان بخش کہا جاسکتا ہے لیکن اس سے نمٹنے کے لئے کوئی لاپروائی نہیں برتیں گے۔
