'این آر سی صرف غیر ملکیوں کے خلاف، مسلمانوں کو خوفزدہ ہونے کی ضرورت نہیں'

مرکزی وزیر برائے اقلیتی امور وحج مختار عباس نقوی نے کہا ہے کہ اقلیتیوں اور خصوصاً مسلمانوں کو این آرسی جیسے قانون سے خوفزدہ ہونے کی کوئی ضرورت نہیں، کیوں کہ این آرسی قانون صرف غیرملکیوں کے خلاف ہے۔ جبکہ مسلمان اس ملک میں صدیوں سے آباد ہیں اور ان کے آبادواجداد بھی یہیں سے تعلق رکھتے ہیں۔

جنوبی ممبئی کے مسلم اکثریتی علاقے بھنڈی بازار میں کھتری جماعت خانہ ہال میں بی جے پی امیدواروں کی انتخابی مہم کا آغاز کرتے ہوئے مختار عباس نقوی نے کہا کہ مسلمانوں کے آبا و اجداد یہیں سے تعلق رکھتے ہیں اور مسلمانوں کو یہاں سے کوئی نکال نہیں سکتا ہے۔

یہ قانون ان لوگوں کے خلاف ہے، جن کے پاس بھارت کی شہریت کا کوئی ثبوت نہیں ہے اور نہ ہی ان کا اس ملک سے کوئی تعلق رہا ہے۔ اس جلسہ سے بی جے پی ترجمان اتل شاہ اور مقامی لیڈر شکیل قاضی اور دیگر نے بھی خطاب کیا۔

انہوں نے کسی سیاسی پارٹی کا نام لئے بغیر کہا کہ چند سیاسی پارٹیاں اس معاملہ میں اقلیتی فرقے کو گمراہ کررہی ہیں اورنقوی نے وزیراعظم نریندرمودی کے سب کا ساتھ سب کا وکاس جیسے نعرہ کا حوالہ دیا جس کے تحت سبھی ترقی کی راہ پر گامزن ہیں۔