بی جے پی لیڈر پرہلاد لودھی کی سزا پر فی الحال روک

مدھیہ پردیش ہائی کورٹ نے ایک افسر کے ساتھ مارپیٹ سے متعلق فوجداری مقدمے میں بھارتیہ جنتا پارٹی (بی جے پی) کے لیڈر پرہلاد لودھی کو بھوپال کی خصوصی عدالت کے ذریعہ سنائی گئی دو سال کی سزا پر آج روک لگا دی۔

ریاستی ہائی کورٹ کی سنگل بنچ کے جج وی پی ایس چوہان نے پوئی سے بی جے پی کے رکن اسمبلی پرہلاد لودھی کی دو برس کی سزا پر اگلے دو مہینہ کے لیے روک لگا دی ہے۔ اس معاملہ کی اگلی سماعت دو مہینہ بعد سات جنوری طے کی گئی ہے۔

عدالت نے حکم میں لکھا ہے کہ عرضی گزار پرہلاد لودھی کی سزا پر روک کے حق میں مضبوط بنیاد لگتی ہے۔

درخواست گزار کے وکیل نے بتایا کہ سزا اور جرمانہ 31 اکتوبر کو سنایا گیا اور انہوں نے چار نومبر کو اپیل لگائی۔ اسمبلی اسپیکر نے بہت ہی جلدی دکھاتے ہوئے دو نومبر کو درخواست گزار کی اسمبلی کی رکنیت ختم کرنے سے متعلق ہدایت جاری کردی۔ ساتھ ہی سیٹ کو بھی خالی اعلان کردیا۔ ان حالات میں سزا پر روک بہت ضروری ہے، کیونکہ درخواست گزار ریاستی اسمبلی کا رکن ہے۔