مہاراشٹر ایوان اسمبلی میں پیش مراعات شکنی نوٹس کی حمایت کر تے ہوئے مہاراشٹر سماجوادی پارٹی رہنما و رکن اسمبلی ابوعاصم اعظمی نے 'ریپبلک ٹی وی چینل' کے سر براہ و ایڈیٹر ارنب گوسوامی پر جم کر تنقید کی اور کہا کہ' ارنب گوسوامی ہمارے وزیر اعلی ادھو ٹھاکرے کے خلاف توہین آمیز کلمات اداکرتا ہے، اسی چینل پر تبلیغی جماعت کو کرونا جماعت قرار دیا گیا تھا، لیکن ہائی کورٹ نے اپنے مشاہدہ اور فیصلہ میں یہ واضح کیا ہے کہ تبلیغی جماعت کو بلی کا بکرا بنایا گیا تھا۔'
انہوں نے اسی کے ساتھ فلم اداکارہ کنگنا رناوت کی اس بات پر (جس میں اداکارہ نے کہاتھاکہ'میں نے فلم انڈسٹری میں سے اسلامی وجود کو ختم کردیا') کہا کہ' اسے شرم آنی چاہئے، وہ کیا جانتی ہے اسلام کے تعلق سے، اسے اسلام سے متعلق اس قسم کی باتیں کر نے کا کوئی حق نہیں ہے۔ فلم انڈسٹری سے اسلام کا کیا تعلق ہے، اگر وہ یہ کہتی کہ میں نے خان برداران کا دبدبہ ختم کیا ہے تو وہ الگ ہے'۔
انہوں نے کہا کہ' جو اس ممبئی شہر میں روزی روٹی کماتے ہیں اور اب وہی لوگ حکومت اور مہاراشٹر کے خلاف توہین آمیز بیان دے رہے ہیں ایسے لوگوں کو ریاست میں رہنے کا کوئی حق نہیں ہے'۔