بی جے پی کو ووٹ نہ دینے کی سزا بھگت رہے میوات کے کسان؟

میوات کے کسان حکومت کے ذریعہ پانی نہ دیے جانے سے سخت ناراض ہیں۔ کوٹلہ پمپ ہاوس آکیڑہ ڈرین کافی دنوں سے بالکل سوکھی پڑی ہے اور فصل کی بوائی کے لیے کسانوں کو پانی کی سخت ضرورت ہے۔

بھارتی ریاست ہریانہ کےنوح سے رکن اسمبلی اور ڈپٹی اپوزیشن لیڈر آفتاب احمد نے کئی درجن کسانوں کے ساتھ اکیڑہ ڈرین جا کر سوکھی نہر دیکھا اور نہر کے اندر ہی میڈیا سے بات کی۔

در اصل کسان حکومت کے ذریعہ پانی نہ دیے جانے سے سخت ناراض ہیں۔ کوٹلہ پمپ ہاوس آکیڑہ ڈرین کافی دنوں سے بالکل سوکھی پڑی ہے اور فصل کی بوائی کے لیے کسانوں کو پانی کی سخت ضرورت ہے،جس کی شکایت کسانوں نے آفتاب احمد سے کی تھی۔

رکن اسمبلی نے بی جے پی حکومت نکتہ چینی کرتے ہوئے کہا کہ حکومت میوات کے ساتھ جانبداری سے کام لے رہی ہے۔ میوات کے تینوں رکن اسمبلی کانگریس سے ہیں اس لئے کسانوں کو تکلیف دی جا رہی ہے۔

انہوں نے کہا کہ بی جے پی کے امیدوار رہے سابق رکن اسمبلی چودھری ذاکر حسین بھی پانی رکوانے میں حکومت کا ساتھ دے رہے ہیں، جبکہ عوام پانی کے بغیر پریشان ہے۔

کسانوں نے کہا کہ 'ہمیں کس بات کی سزا دی جا رہی ہے؟ ہمیں پانی کیوں نہیں دیا جا رہا ؟ کیا اس لئے کہ ہم نے بی جے پی کو ووٹ نہیں دیا۔کیا جمہوریت میں اس طرح جانب داری برتی جائے گی۔ہمیں ایک برس سے اسی طرح پریشان کیا جا رہا ہے'۔

رکن اسمبلی آفتاب احمد نے انتباہ دیا کہ 'اگر ایک ہفتہ میں میوات کے حصے کا پانی نہیں ملا تو ہم آر پار کی لڑائی لڑیں گے اور احتجاجی دھرنا دیں گے ہم ہر حال میں پانی لیں گے'۔