مانسون اجلاس سے متعلق تیاریوں کو حتمی شکل دینے کے لیے میٹنگ

لوک سبھا اسپیکر اوم برلا نے مانسون اجلاس سے متعلق تیاریوں کو حتمی شکل دینے کے لیے آج وزارت صحت، ایمس، آئی سی ایم آر، ڈی آر ڈی او اور دہلی حکومت کے محکمہ صحت کے ماہرین کے ساتھ میٹنگ کی۔

اوم برلا نے حکام کو ہدایت دی کہ پارلیمنٹ کے مانسون اجلاس کے پیش نظر صحت حفاظت کے تعلق سے خصوصی چوکسی برتی جائے اور پارلیمنٹ کمپلکس میں بھی صحت جانچ کے لیے وسیع انتظامات کیے جائیں۔

انہوں نے کہا کہ انفیکشن نہ پھیلے اور پارلیمنٹ چلے، اس کے لیے ماہرین کے مشوروں کے مطابق تیاری کی جائے گی اور پارلیمنٹ کمپلکس کے اندر وسیع سکیورٹی انتظامات کے ساتھ اجلاس چلے گا۔ تمام اراکین پارلیمان سے درخواست کی جائے گی کہ وہ اپنا کووڈ۔ 19 ٹیسٹ کرائیں۔

اوم برلا کی ہدایت کے مطابق کورونا انفیکشن سے بچاؤ کے تمام اقدامات کئے جارہے ہیں۔ اس کے لیے پارلیمنٹ کے احاطہ اور پارلیمنٹ کی عمارت میں داخلہ کے وقت تھرمل گن اور تھرمل اسکینر سے درجہ حرارت کی جانچ کی جائے گی۔

اس کے علاوہ پارلیمنٹ کے کمپلکس میں سینی ٹائزیشن کا انتظام کیا جائے گا۔ پارلیمنٹ کمپلکس میں 40 جگہوں پر ٹچ لیس سینی ٹائزر لگائے جائیں گے اور ایمرجنسی میڈیکل ٹیم اور ایمبولنس کی سہولت رہے گی۔

پورے احاطہ میں کووڈ۔ 19 سے بچاؤ کی رہنما ہدایات پر سختی سے عمل کیا جائے گا۔ لوک سبھا چیمبر میں سماجی دوری اور دیگر رہنما ہدایات پر عمل کیا جائے گا۔

اوم برلا نے یہ بھی ہدایت دی کہ مانسون اجلاس کے دوران حکام اور ملازمین کی صحت جانچ کا بھی انتظام کیا جائے۔ اس سلسلہ میں ملازمین کے لئے تفصیلی گائڈ لائنس بنائی جارہی ہیں۔

ضرورت پڑنے پر ملازمین کی تعداد بھی کم کی جاسکتی ہے۔ وزارت کے حکام اور اراکین پارلیمان کے اسٹاف کی بھی جانچ کا انتظام کیا جائے گا۔

اس کے ساتھ ہی لوک سبھا اور راجیہ سبھا کے میڈیا کے لوگوں کی زیادہ سے زیادہ تعداد 100 تک رکھنے کی بھی تجویز ہے۔ میڈیا کے لوگوں کا بھی کووڈ ٹیسٹ لازمی ہوگا۔