اترپردیش میں انتخابی مہم کے دوران وزیراعظم مودی مایاوتی اور اتحاد کو تنقید کا نشانہ بناتے ہیں تو مایاوتی بھی جوابی ردعمل سے پیچھے نہیں ہٹتی ہیں۔
بی ایس پی کی سربراہ مایاوتی نے وزیراعظم مودی کے بے نامی جائیداد کے الزام پر پلٹ وار کرتے ہوئے کہا کہ سب سے زیادہ بے نامی جائیداد والے بی جے پی سے جڑے ہیں۔
مایاوتی نے وزیراعظم پر نکتہ چینی کرتے ہوئے کہا کہ ملکی اور عوامی مفاد میں وزیراعظم مودی انفٹ، جبکہ وہ فٹ ہیں۔
قومی سطح پر خود کو وزیراعظم مودی کے مقابلے میں پیش کرنے کی کوشش میں مصروف مایاوتی ان دنوں وزیراعظم مودی کو کھل کر تنقید کا نشانہ بنا رہی ہیں۔
انہوں نے کہا: 'وزیراعظم مودی اپنی حدیں پار چکے ہیں، وہ بی ایس پی کو بہن جی کی جائیداد کہنے میں گھبراتے نہیں ہیں۔ میرے پاس کچھ بھی ہے، وہ سماج کے لوگوں نے دیا ہے اور حکومت سے کچھ چھپایا نہیں ہے۔'
اس سے قبل وزیراعظم نریندر مودی نے منگل کے روز حزب اختلاف کی جماعتوں کی تنقید کرتے ہوئے کہا تھا کہ مہاملاوٹی لوگوں کے پاس نامی اور بے نامی جائیدادوں کے انبار لگے ہوئے ہیں۔ اپنے اور اپنے رشتہ داروں کے لیے بنگلے کھڑے کیے ہیں۔
