اردو اسکولوں میں'یوم مراٹھی' منایا گیا

اورنگ آباد شہر کے ڈھائی سو سے زائد اردو اسکولوں میں یوم مراٹھی منایا گیا، اس موقع پر اردو میڈیم اسکولوں کی تمام تر سرگرمیاں مراٹھی میں انجام پائیں۔

اورنگ آباد کی فلاحی تنظیم ریڈ اینڈ لیڈ فاؤنڈیشن پچھلے ایک مہینے سے اردو کے طلبا وطالبات میں مراٹھی زبان سے ہم آہنگی کی مہم چلارہی ہے۔

ریڈ اینڈ لیڈ فاؤنڈیشن کے صدر مرزا عبدالقیوم پچھلے ایک مہینے سے شہر ومضافات کے اسکول گھوم کر اردو میڈیم کے طلبا میں مراٹھی زبان کے تعلق سے بیداری پیدا کرنے کی کوشش کررہے ہیں۔

اس کے اثرات اردو اسکولوں کے طلبا میں صاف نظر آرہے ہیں۔ مراٹھی زبان سے بھاگنے والے طلبا آج مراٹھی زبان نہ صرف روانی سے بول رہے ہیں بلکہ اپنی تمام سرگرمیاں مراٹھی زبان میں انجام دے رہے ہیں۔ مراٹھی گورو دیوس کے موقع پر ایسا ہی کچھ نظارہ اورنگ آباد کے امان اللہ موتی والا اسکول میں دیکھنے کو ملا۔

یہ معاملہ صرف ایک اسکول تک محدود نہیں رہا بلکہ شہر کے ستاون اردو ہائی اسکول اور دو سو پرائمری اسکولوں میں مراٹھی زبان میں سرگرمیاں انجام پائیں۔ مرزا عبدالقیوم نے اسے ایک بڑی کامیابی سے تعبیر کیا۔ اسی طرح اسکول کے ذمہ داروں نے اس پروگرام میں بڑھ چڑھ کر حصہ لیا، اس موقع پر طلبا وطالبات میں کافی جوش وخروش دیکھا گیا۔

ریڈ اینڈ لیڈ فاؤنڈیشن پچھلے ایک مہینے سے اسکولی طلبا کے درمیان خطوط نویسی مہم چلارہی ہے۔ اس مہم کے تحت اب تک 16 ہزار طلبا وطالبات سے مراٹھی زبان میں خطوط لکھوائے گئے ہیں۔ تنظیم نے پچیس ہزار خطوط لکھوانے کا ٹارگیٹ طئے کیا ہے، ٹارگیٹ پورا ہوتے ہی یہ تمام خطوط ریاست کے وزیراعلی سمیت اعلی افسران کو روانہ کیے جائیں گے۔