بیگوسرائے میں اسکارپیو اور ٹرک کے درمیان ہونے والی شدید ٹکر میں چار افراد ہلاک اور ایک زخمی ہوگیا۔
پولیس ذرائع نے بتایا ہے کہ 'ہفتہ کی شب قاسم پور گاؤں کے آزاد نگر ٹولہ میں ایک شرادھ کا پروگرام منعقد کیا گیاتھا۔ اسی دوران دہی ختم ہوگیا۔ کچھ لوگ اسکارپیو سے دہی لے کر واپس آرہے تھے۔ جب لاکھو پٹرول پمپ کے قریب ان کی گاڑی بے قابو ہوگئی اور سڑک کے کنارے کھڑے ٹرک سے ٹکرا گئی'۔
اس حادثے میں اسکارپیو میں سوار چار افراد کی موقع پر ہی موت ہوگئی جبکہ ایک شخص زخمی ہوگیا۔
ذرائع نے بتایا کہ ہلاک ہونے والوں کی شناخت قاسم پور گاؤں کے آزاد نگر کے رہنے والے چیکو کمار، نرنجن رائے ولد پنکج کمار، بھگوان پور گاؤں کے رہائشی بمبم مہتو ولد راجکمار مہتو کےطور پر کی گئی ہے۔
ہلاک ہونے والے ایک اور شخص کی شناخت نہیں ہوسکی ہے۔ حادثے میں زخمی ہونے والے شخص کو بیگوسرائے صدر اسپتال میں داخل کیا گیا ہے۔ لاشوں کو پوسٹمارٹم کے لئے بھیج دیا گیا ہے۔