'ممتا بنرجی مغربی بنگال کو کشمیر بنانا چاہتی ہیں'

بی جے پی کے رہنما و رکن پارلیمان ارجن سنگھ نے ممتا بنرجی پر سخت تنقید کرتے ہوئے کہا کہ' وہ مغربی بنگال کو کشمیر میں تبدیل کرنے کی کوششیں کر رہی ہیں۔'

ریاست مغربی بنگال میں گذشتہ روز بی جے پی کے رہنما اور بارک پور سے رکن پارلیمنٹ ارجن سنگھ نے وزیر اعلیٰ ممتا بنرجی پر تنقید کی اور کہا کہ انہیں اقتدار میں رہنے کا جنون ہے، اور وہ بنگال کو کشمیر بنانا چاہتی ہیں۔

بی جے پی کے رہنما و رکن پارلیمان ارجن سنگھ

للوا میں ایک اجتماع سے خطاب کرتے ہوئے انہوں نے کہا کہ 'ممتا بنرجی اقتدار میں رہنے کے لیے کچھ بھی کر سکتی ہیں، انھیں ڈر ہے کہ وہ اسمبلی کے انتخابات میں ہار جائیں گی۔'

ارجن سنگھ نے کہا کہ 'جس دن وہ اقتدار سے محروم ہو جائیں گی، وہ خود کو ہلاک کر لیں گی۔ ارجن سنگھ نے یہ بھی الزام لگایا کہ ممتا ووٹ بینک کی خاطر بنگلہ دیشی اور روہنگیا مسلمانوں کو پناہ دے رہی ہیں۔

بھتپارہ سے الیکشن لڑنے کے لیے وزیر اعلیٰ کو چیلنج کرتے ہوئے ارجن سنگھ نے کہا، 'اس سے بلکل فرق نہیں پڑتا کہ آپ کتنے فسادات کراتی ہیں، آپ بھتپارہ میں داخل نہیں ہو سکتے، بھتپارہ کی عوام ارجن سنگھ کو جانتی ہے، آپ کو نہیں۔'

'ہم بھتپارہ کے دل میں ہیں اور بی جے پی بھتپارہ کے دل میں ہے۔ ممتا بنرجی غنڈوں اور پولیس کا استعمال کر کے بھتپارہ نہیں جیت سکتی۔ پولیس ہر بات سے آگاہ ہے لیکن وہ ممتا کے اشارے پر کام کر رہی ہے۔'

ارجن سنگھ نے یہ بھی دعویٰ کیا کہ ترنمول کانگریس کے 107 رکن اسمبلی بی جے پی کے رابطے میں ہیں، اور اس طرح ریاست میں اسمبلی انتخابات 2021 سے قبل ہو سکتے ہیں۔

واضح رہے کہ اجلاس کے ارجن سنگھ کی قیادت میں تقریباً 500 افراد نے بی جے پی میں شمولیت اختیار کی۔