برطانیہ ہائی کورٹ میں مالیا کی حوالگی کی درخواست خارج

مفرور شراب کاروباری وجے مالیا کو برطانیہ ہائی کورٹ نے پیر کو بڑا جھٹکا دیتے ہوئے بھارت کے حوالے کرنے کے خلاف دائر کی گئی اس کی عرضی خارج کردی ہے۔

برطانیہ ہائی کورٹ سے مالیا کی اپیل خارج ہونے کے بعد بھارت کے حوالے کرکےعدالتی کارروائی کا سامنا کرنے کا راستہ صاف ہوگیا ہے اگرچہ وہ 14 دنوں کے دوران اس فیصلے کے خلاف سپریم کورٹ میں اپیل داخل کرسکتا ہے۔

مالیا کی طیارہ کمپنی کنگ فیشر ایئر لائنس پر کئی بینکوں کے 9000 کروڑ روپے کا قرض ہے، ہائی کورٹ کے اس فیصلے کے بعد یہ معاملہ برطانیہ کی وزیر داخلہ پریتی پٹیل کے پاس جائے گا۔

واضح رہے کہ مالیا نے 31 مارچ کو اپنے ایک ٹویٹ میں کہا تھا کہ وہ مسلسل بینکوں کو ان کی پوری رقم واپس کرنے کی پیشکش کرتے رہے ہیں، لیکن نہ تو بینک اپنا پیسہ لینے کے خواہش مند ہیں اور نہ ہی انفورسمنٹ ڈائریکٹوریٹ اس کی جائیداد چھوڑنے کے لئے تیار ہے، اس نے کہا تھا 'امید کرتا ہوں کہ وزیر مالیات اس بار میری بات سنیں گی'۔