نیٹ امتحان میں معاذ نے ضلع بھر میں اول مقام حاصل کیا

گزشتہ دنوں مقابلہ جاتی امتحان نیٹ کے نتائج کا اعلان کیا گیا تھا، جس میں مختلف ریاستوں اورعلاقوں کے طلبا نے شرکت کی تھی اور اپنی صلاحیت کا لوہا منوایا، اسی میں معاذ بھی ہیں جنہوں نے اترا کھنڈ کے ضلع ادھم سنگھ نگر میں نیٹ کے مقابلہ جاتی امتحان میں اول مقام حاصل کیا ہے۔

اتراکھنڈ کے کاشی پور علاقے کے باشندہ سعید احمد خان کے بیٹے معاذ خان نے نیٹ امتحان میں شاندار کامیابی حاصل کر کے نہ صرف خاندان کا نام روشن کیا ہے بلکہ ضلع بھر میں بھی اس کی ستائش کی جا رہی ہے۔

ہومیو پیتھک کے پیشے سے وابستہ ڈاکٹر سعید احمد کا خواب تھا کہ وہ اپنے تین بیٹوں میں سے ایک کو قابل ڈاکٹر بنائیں گے، معاشرے اور ملک کے ایسے کمزور طبقے کے لوگوں کی خدمت کریں گے جو اچھے علاج سے قاصر ہیں اور اسی وجہ سے انہوں نے بچوں کی تعلیم پر سخت محنت کی اور انہیں اچھی تعلیم سے آراستہ کرایا، انہوں نے اپنے بیٹے کو علی گڑھ مسلم یونیورسٹی میں داخل کرایا جہاں ان کا بڑا بیٹا معاذ خان نے اپنے والد کا خواب پورا کیا اور نیٹ کے امتحان میں 646 نمبر حاصل کرنے کے ساتھ ساتھ اس نے اتراکھنڈ کے کومون میں ٹاپ پوزیشن حاصل کی ہے۔

معاذ خان نے نیٹ میں 646 نمبرات حاصل کیے، ای ٹی وی سے بات چیت میں معاذ خان نے بتایا کہ علم ہی انسان کا سب سے بڑا ہتھیار ہے، جو ہر خواہش کو سانچے میں ڈھال سکتا ہے، میری اور میرے والدین کی خواہش رہی ہے کہ میں ایک قابل ڈاکٹر بن کر غربا و مساکین اور قوم کی مدد کروں۔ معاذ نے مسرت کا اظہار کرتے ہوئے کہا کہ اب وہ بہت جلد اس مقام پر پہنچے گا اور عوام کی خدمت کرے گا۔