صنعت کاروں کا ساتھ چھوڑ کر کسانوں کا ساتھ دیں مودی: راہل گاندھی

کانگریس کے سینیئر رہنما راہل گاندھی نے کسانوں کے مسئلے پر ایک بار پھر وزیر اعظم مودی کو گھیرنے کی کوشش کی۔ انہوں نے کہا کہ حکومت کو صنعت کاروں کی فکر چھوڑ کر کسانوں کے مطالبات پر غور کرنا چاہیے۔

کانگریس کے سابق صدر راہل گاندھی نے وزیراعظم نریندر مودی پر کسانوں کے مطالبات کے سلسلے میں ایک بار پھر حملہ کرتے ہوئے اتوار کو کہا کہ پی ایم مودی کو وقت رہتے اپنے صنعت کار دوستوں کے لئے نہیں بلکہ کسانوں کے حق میں کام کرنا چاہئے۔

مسٹر گاندھی نے کہا کہ کسان ملک کے ان داتا ہیں اور حکومت کو ان کی ہر بات سننی چاہئے۔ اس سمت میں کام کرنے کا اب بھی وقت ہے اس لئے مودی حکومت کو ان کے مطالبات پر غور کرنا چاہئے۔

راہل گاندھی نے ٹویٹ کیا کہ 'اب بھی وقت ہے مودی جی، ان داتا کے ساتھ دو،صنعت کاروں کا ساتھ چھوڑو۔'

اس کے ساتھ ہی کانگریس نے راہل گاندھی کا اپریل 2015 کا ایک ویڈیو بھی پوسٹ کیا ہے جس میں وہ پارلیمنٹ میں وزیر اعظم مودی کو صلاح دے رہے ہیں کہ ان کی حکومت کو چند صنعت کار دوستوں کے لئے نہیں بلکہ کسانوں کی خوشحالی کےلئے کام کرنا چاہئے کیونکہ کسان اور مزدور ہی ملک کی ترقی کی بنیاد ہیں۔