جھارکھنڈ مکتی مورچہ اور کانگریس میں سیٹوں کی تقسیم مکمل

جھارکھنڈ مکتی مورچہ کے ہیمنت سورین نے کہا کہ ان کی جماعت نے لوک سبھا انتخابات کے لیے کانگریس کے ساتھ اتحاد کو قطعیت دے دی ہے۔

انہوں نے آج میڈیا سے بات چیت کرتے ہوئے کہا کہ ریاست میں کانگریس 7 سیٹوں پر، جھارکھنڈ مکتی مورچہ 4، جھارکھنڈ وکاس مورچہ 2 سیٹوں پر انتخاب لڑے گی۔

جارکھنڈ مکتی مورچہ کے شیبو سورین کی رہائش گاہ پر پارٹی کے کارگذار صدر ہیمنت سورین کے ساتھ مختلف کانگریسی رہنماؤں نے ملاقات کی۔ اس موقع پر جھارکھنڈ میں مہا گٹھ بندھن کے اتحادی پارٹیوں کے درمیان تمام 14 لوک سبھا سیٹوں کی تقسیم کا اعلان کیا گیا۔

اس سمجھوتے کے تحت کانگریس راچنی، کھونٹی، لوہردگا، مغربی سنگھ بھوم، ہزاری باغ، دھنباد اور چترا سے انتخابات لڑے گی جبکہ دمکا، راج محل، گریڈیہ اور جمشیدپور سے جھارکھنڈ مکتی مورچہ، کڈرما اور گڈا سے جھارکھنڈ وکاس مورچہ اور پلامو سیٹ سے آر جے ڈی اپنے امیدوار میدان میں اتاریں گے۔