یکم تا چھ ستمبر منعقد ہونے والے جے ای ای امتحانات سے قبل مرکزی وزیر تعلیم نشانک پوکھریال نے طلبا وطالبات کو نیک خواہشات پیش کیں، وزیر تعلیم نے ایک ٹویٹ کیا ہے اور طلبا اور ان کے والدین سے اپیل کی ہے کہ وہ حکومت کی جانب سے جاری کر دہ رہنما خطوط کے مطابق امتحانی مراکز پر پہنچیں۔
وزیر تعلیم نے طلباء اور ان کے والدین کو یہ یقین دہانی بھی کرائی ہے کہ تمام ریاستوں کے وزرائے اعلی اور انتظامی عہدیداروں نے کہا ہے کہ طلبا کو ہر طرح کی مدد دی جائے گی۔ یاد رہے کہ ملک بھر میں لگ بھگ 11 لاکھ طلباء نے جے ای ای امتحان کے لیے درخواست دی ہے۔
یہ بھی پڑھیں؛ جے ای ای مین امتحانات آج سے شروع، 37 ہزار طلبا کی شرکت متوقع
خاص بات یہ ہے کہ 'این ٹی اے' کے ما تحت منعقد کیے جانے والے مقابلہ جاتی (انٹرنس) امتحان کو کورونا وبا کے بڑھتے کیسز کے پیش نظر منسوخ کرنے کی اپیل کی گئی تھی، امتحان کے انعقاد کے خلاف سپریم کورٹ میں عرضی بھی داخل کی گئی تھی لیکن عدالت عظمی نے امتحان کے منسوخ کرنے کی اپیل کو خارج کر دیا تھا۔
جس کے بعد ملک بھر میں طلباء وطالبات نے اس کی مخالفت کی تھی، سبھی سوشل میڈیا پر مسلسل 'جے ای ای-نیٹ بائیکاٹ' کا ٹرینڈ چلایا جانے لگا، سبھی سیاسی جماعتیں بھی اس کی مخالفت میں میدان میں اتر آئی تھیں۔
