'ممبران پارلیمنٹ کی حفاظت کو یقینی بنانا ہماری ذمہ داری ہے'

کانگریس پارٹی کے رکن پارلیمان رونیت سنگھ نے آج لوک سبھا اسپیکر اوم برلا کے سامنے اراکین پارلیمان کی مراعات کا معاملہ اٹھاتے ہوئے کہا کہ دہلی پولیس نے ان پر طاقت کا استعمال کیا۔

لوک سبھا میں آج کارروائی شروع ہوتے ہی رونیت سنگھ نے کہا کہ پیر کی شام سات بجے وہ اور ان کے ساتھ تین دیگر اراکین پارلیمنٹ کمپلیکس کے صدر دروازے کے باہر کسان بل کے خلاف پرامن طور پر کینڈل مارچ کے لیے گئے۔ اسی دوران تقریبا 100 کی تعداد میں پولس اہلکار وہاں پہنچے اور ان کے ساتھ زور زبردستی کی، جس کی وجہ سے انھیں چوٹیں پہنچی۔

رونیت سنگھ نے کہا کہ چاروں ممبران پارلیمنٹ کے باہر وجے چوک کے علاقے میں صرف موم بتیاں لے کرعلامتی مظاہرے کی شکل میں جانا چاہتے تھے۔ رکن پارلیمان کی حیثت اپنی شناخت ظاہر کرنے کے باوجود پولیس نے ان کے ساتھ مارپیٹ کی۔ انہوں نے کہا کہ جب دہلی پولیس ممبران پارلیمان کے ساتھ ایسی بدسلوکی کر سکتی ہے تو پھر وہ عام کسانوں اور لوگوں کے ساتھ کیسا سلوک کرتی ہوگی۔

لوک سبھا اسپیکر اوم برلا نے کہا کہ انہوں نے رونیت سنگھ کی تحریری شکایت پر رپورٹ طلب کی ہے، جس میں اس واقعے سے متعلق ضروری معلومات دینے کو کہا گیا ہے۔
برلا نے مزید کہا کہ ممبران کی حفاظت کو یقینی بنانا ان کی ذمہ داری ہے۔ انہوں نے کہا کہ وہ ارکان پارلیمان کو اپنی حفاظت کے لئے یقین دہانی کے ساتھ ساتھ یہ یقین بھی دلاتے ہیں کہ پارلیمنٹ اجلاس کے دوران اور پارلیمنٹ کے باہران کے حقوق کا تحفظ کیا جائے گا۔