حالات صحیح رہے تو جلد شروع ہوں گی بین الاقوامی پراوزیں: مرکزی وزیر

مرکزی وزیر برائے شہری ہوا بازی ہردیپ سنگھ پوری نے کہا کہ اگر حالات صحیح رہے تو جون کے وسط سے جولائی کے شروع تک بین الاقوامی پروازیں شروع کی جاسکتی ہیں۔

ہردیپ سنگھ پوری نے فیس بک لائیو سیشن میں ایک سوال کے جواب میں یہ بات کہی کہ اگر کورونا وائرس کا انفیکشن ہمارے اندازے کے مطابق رہتا ہے اور ہماری تیاری پوری ہوجاتی ہے تو ہم اگست۔ستمبر تک کیوں انتظار کریں، ہم جون کے وسط سے جون کے آخر تک یا جولائی کے شروع میں بھی بین الاقوامی پروازیں شروع کرسکتے ہیں۔

واضح رہے کہ ملک میں سبھی بین الاقوامی پروازیں 22 مارچ سے اور گھریلو مسافر پروازیں 25 مارچ سے بند ہیں۔ جبکہ بیرون ممالک پھنسے بھارتی شہریوں کو لانے کے لیے 'وندے بھارت مشن' کے تحت سات مئی سے منتخب راستوں پر پروازیں چلائی جارہی ہیں لیکن یہ باقاعدہ تجارتی پروازیں نہیں ہیں۔

اس کے علاوہ حکومت نے 25 مئی سے گھریلو مسافر پروازوں کی اجازت دی ہے۔ اس کی شروعات ایک تہائی پروازوں سے کی جارہی ہے۔

مرکزی وزیر نے کہا کہ 'وندے بھارت مشن اور گھریلو پروازوں کے تجربے سے بین الاقوامی پروازوں کی تیاری کرنے میں مدد ملے گی۔ اقوام متحدہ کی بین الاقوامی شہری ہوا بازی کی تنظیم بین الاقوامی پروازوں کے لیے ہدایات تیار کرنے میں مصروف ہے جیسے ہی حالات معمول پر آئیں گے پروازیں شروع کرنے کی اجازت دے دی جائے گی۔