'کنٹینمینٹ زون کی تعداد میں اضافہ پر توجہ دیں'

مرکزی وزیر صحت و خاندانی بہبود ڈاکٹر ہرش وردھن کا یہ اعلان اس وقت سامنے آیا، جب کچھ ریاستوں میں کورونا وائرس کے معاملات میں تیزی سے اضافہ ہو رہا ہے۔

مرکزی وزیر صحت و خاندانی بہبود ڈاکٹر ہرش وردھن نے کہا کہ 'مہلک وائرس کے پھیلاؤ کو روکنے کے لئے کووڈ۔19 کنٹینمینٹ زونکی تعداد میں اضافہ کرنے کی سمت فوری کارروائی کی جانی چاہئے'۔

مرکزی وزیر برائے صحت و خاندانی بہبود ڈاکٹر ہرش وردھن نے چند ریاستوں سے کورونا کے معاملات میں اضافے کے پس منظر میں کہا ہے کہ 'کنٹینمینٹ زون کی تعداد میں اضافے پر فوری توجہ دینے کی ضرورت ہے'۔

انہوں نے کہا ہے کہ 'مؤثر طریقے سے قابو پانے کی حکمت عملی کو عملی جامہ پہنانے کے لئے گنجان آباد علاقوں کی نقشہ سازی کی جانی چاہئے۔ اس کے علاوہ فی لاکھ آبادی میں ہونے والے ٹیسٹوں کے ساتھ ہی اموات کی شرح میں اضافے پر بھی غور کیا جانا چاہئے'۔

ڈاکٹر وردھن نے مہاراشٹر کے وزیر صحت راجیش ٹوپے اور ریاست کے میڈیکل ایجوکیشن منسٹر امیت دیشمکھ سے ایک اعلی سطحی اجلاس کی صدارت میں یہ بات کہی ہے۔

اس میٹنگ میں مہاراشٹر کے کووڈ 19 متاثرہ اضلاع کے ڈی ایم بھی موجود تھے۔

یہاں یہ بات قابل ذکر ہے کہ ریاست میں مہاراشٹر کے تمام 36 اضلاع متاثر ہیں۔ اس اجلاس میں ممبئی، تھانہ، پونے، ناسک، پالگھر، ناگپور اور اورنگ آباد جیسے اضلاع پر خصوصی توجہ دی گئی۔