ہندوؤں کی نقل مکانی، بی جے پی کا سیاسی حربہ

میرٹھ شہر کے پرہلاد نگر علاقے میں گزشتہ کئی روز سے ہندوؤں کی نقل مکانی کے معاملات زوروں پر ہیں۔ ہندو مہا سبھا نے پریس کانفرنس کے ذریعہ اسے بی جے پی کا سیاسی حربہ قرار دیا ہے۔

ہندو مہا سبھا کے نائب صدر پنڈت اشوک نے ای ٹی وی بھارت سے بات کرتے ہوئے کہا کہ میرٹھ میں نقل مکانی کا معاملہ نیا نہیں ہے بلکہ یہ برسوں سے چلا آ رہا ہے۔

انہوں نے مزید کہا کہ 'جو بھی ہندو بھائی اپنا مکان فروخت کرتے ہیں اس میں ان کی رضامندی ہوتی ہے۔ اگر کوئی شخص اپنی مرضی سے کسی دیگر مقام پر رہنا چاہتا ہے تو اس کو نقل مکانی کا نام دینا مناسب نہیں ہے'۔

انہوں نے بتایا کہ ضمنی انتخابات بالکل قریب میں ہیں اس لیے بی جے پی اسے سیاسی مسئلہ بنا کر دوبارہ عوام میں مقبولیت حاصل کرنا چاہتی ہے۔

انہوں نے مزید کہا کہ پہلادنگر میں ہندو مسلم آپس میں اتحاد کے ساتھ رہتے ہیں لیکن علاقے کے رہنما اسے سیاسی مسئلہ بنا رہے ہیں۔

آخر میں انہوں نے کہا کہ اگر بھارت کو ہندو راشٹر بنا دیا جائے تو سارے مسائل کا خاتمہ ہو جائے گا۔