پیاز 150 کے پار

پیاز کی قیمت میں مزید اضافہ ہوگیا ہے اور یہ آنسو ہی نہیں نکال رہی بلکہ نئے نئے ریکارڈ بنا رہی ہے۔ گووا کی راجدھانی پنجی میں اس کا خردہ قیمت 165روپے فی کلوگرام تک پہنچ گئی ہے۔

ملک کے چاروں بڑے شہروں میں پیاز کی خردہ قیمت ایک سو یا 120روپے فی کلوگرام یا اس سے زیادہ ہے۔ قومی راجدھانی دہلی میں پیاز کی قیمت 98روپے فی کلوگرام ہے جبکہ چنئی میں 138روپے، کولکتہ میں 140روپے اور ممبئی میں 120روپے فی کلوگرام ہے۔ ملک میں پیاز کی سب سے کم قیمت اترپردیش کے جھانسی میں ہے، جہاں اس کی خردہ قیمت 43روپے فی کلوگرام ہے۔

سرکاری رپورٹ کے مطابق جھارکھنڈ کی راجدھانی میں جہاں اسمبلی انتخابات ہورہے ہیں، لوگ ایک سو روپے یا اس سے زیادہ قیمت پر پیاز خرید رہے ہیں۔ کوزی کوڈ میں پیاز کی قیمت 160روپے فی کلوگرام، ایناکلم میں 150روپے، وائناڈ میں 155روپے، تروچراپلی اور پورٹ بلیئر میں 140روپے، بنگلورو میں 140روپے اور مینگلور میں 149روپے فی کلوگرام ہے۔ پٹنہ میں پیاز 90روپے فی کلوگرام فروخت ہورہی ہے۔

پیاز کی پیداوار کے لئے مشہور مہاراشٹر کے ناسک میں اس کی قیمت 79روپے فی کلوگرام پہنچ گئی ہے۔ رام پور ہاٹ اور ساگر میں اس کی قیمت 50روپے فی کلوگرام ہے۔ اترپردیش کے لکھنو او ر میرٹھ میں پیاز کی قیمت 120روپے فی کلوگرام، وارانسی میں 92 روپے، کانپور میں 65روپے اور الہ آباد میں 75روپے فی کلوگرام ہے۔ شمال مشرق کے اگرتلہ میں پیاز 120روپے اور ایٹانگر میں 100روپے فی کلوگرام فروخت ہورہی ہے۔پیاز کی ضرورت اور سپلائی میں 30سے40فیصد کا فرق ہے۔

پیاز کی قیمت میں بڑے اضافہ کے پیش نظر حکومت نے اس کی برآمد روک دی ہے اور درآمد کے لئے ٹنڈر جاری کیا ہے۔ بیرون ملک بھی پیاز کی قیمتوں میں تیزی ہے۔ حکومت نے 56000ٹن پیاز کا بفراسٹاک بنایا تھا لیکن وہ ختم ہوگیا ہے۔