راجستھان اور ہریانہ کے میوات علاقوں میں متعدد مقامات پر تیز بارش اور ژالہ باری کے سبب کئی گھروں کی چھتیں گر جانے سے ایک لڑکے کی موت اور متعدد افراد کے زخمی ہونے کی خبر ہے۔
ہریانہ کے ضلع نوح، پونہانہ اور نگینہ بلاک میں بالخصوص کچے مکانات کو کافی نقصان ہوا ہے۔
اسی طرح راجستھان کے ضلع بھرتپور میں واقع میوات کے گوپال گڑھ کے آس پاس گاؤں میں بھی کافی نقصان ہوا ہے۔ لاڈمکا گاؤں میں تیز آندھی کے سبب ایک ٹاور گر گیا، لیکن اس دوران کسی جانی نقصان کی اطلاع نہیں ہے۔
وہیں لاڈمکا گاؤں کے پاس جوت قادر گاؤں میں گھر منہدم ہوجانے سے ایک لڑکے کی موت ہوگئی اور گھر میں آدھے درجن افراد زخمی ہو گئے۔
بارش اور ژالہ باری کے وقت پورے علاقے میں افرا تفری کا ماحول پیدا ہو گیا۔ اس دوران لوگ خود کو اور اپنے مویشیوں کو بچاتے نظر آئے۔
