شمالی ہند میں برفباری اور بارش سے ٹھنڈ میں اضافہ

شمالی بھارت میں سردی میں زبردست اضافہ درج کیا گیا ہے، بعض مقامات پر درجہ حرارت منفی میں چلا گیا اس دوران بارش نے درجہ حرارت میں مزید کمی کر دی۔

شمالی بھارت میں کڑاکے کی ٹھنڈ سے عام زندگی متاثر ہو گئی ہے، شمالی بھارت کے پہاڑی علاقوں میں برف باری تو میدانی علاقوں میں بارش کا سلسلہ جاری رہا۔

ریاست ہماچل پردیش، جموں کشمیر اور اتراکھنڈ کے متعدد علاقوں میں شدید برف باری کا سلسلہ جاری ہے۔

وہیں ہماچل پردیش کے منالی میں برفباری کی وجہ سے کئی سیاح مختلف مقامات پر پھنسے ہوئے ہیں۔

جبکہ قومی دارالحکومت دہلی اورریاست ہریانہ کے گروگرام میں آج بارش ہوئی ہے۔

محکمہ موسمیات نے اتراکھنڈ میں شدید برف باری اور جموں و کشمیر کے متعدد علاقوں میں برف باری کے لیے یلو الرٹ جاری کیا ہے، جموں سرینگر قومی شاہراہ اور مغل روڈ برف باری کے باعث بند ہونے کی وجہ سے کشمیر ملک کے متعدد حصوں سے کٹ گیا ہے۔