وزیراعظم کے خلاف معاملے میں بدھ کو سماعت

انتخابی ضابطہ اخلاق کی خلاف ورزی کے معاملے میں وزیر اعظم نریندر مودی اور بھارتیہ جنتا پارٹی کے قومی صدر امت شاہ کو کلین چٹ دیے جانے کے معاملہ پر بدھ کے روز سپریم کورٹ میں سماعت ہوگی۔

عدالت نے درخواست گزار کانگریس کی رکن پارلیمان سشمیتا دیو کو پیر کو اجازت دی کہ وہ مودی اور شاہ کو کلین چٹ دیے جانے کے الیکشن کمیشن کے فیصلوں کو ریکارڈ میں لائیں۔ اب اس معاملہ کی سماعت بدھ کو ہوگی۔

کانگریس کی رکن پارلیمان کی جانب سے پیش وکیل ابھیشیک منو سنگھوی نے پیر کو دلیل دی کہ الیکشن کمیشن نے ان شکایات کا تصفیہ کیا ہے لیکن معاملہ یہیں ختم نہیں ہو جاتا۔ اس معاملے میں عدالت کو تفصیل سے دیکھنے اور ہدایات جاری کرنے کی ضرورت ہے کہ کتنے وقت میں شکایات کا تصفیہ کیا جائے۔

انہوں نے کمیشن کے فیصلے میں سبب بتائے جانے کی بھی ضرورت کا اظہار کیا۔ یہ معاملہ صرف ضابطہ اخلاق کی خلاف ورزی کا ہی نہیں ہے بلکہ عوامی نمائندہ ایکٹ کی خلاف ورزی کا بھی ہے۔

سنگھوی نے دلیل دی کہ وزیر اعظم کے خلاف چھ معاملوں میں پانچ میں اختلاف تھے۔کانگریس کو تفصیل سے اسباب بھی نہیں بتائے گئے۔ ایسے ہی بیانات پر دوسری پارٹیوں کے رہنماؤں کو سزا دی گئی۔