اس معاملے میں سپریم کورٹ نے 13 اپریل کو پریس کونسل آف انڈیا کو پارٹی بنانے کو کہتے ہوئے سماعت ملتوی کردی تھی اور اب اس کی سماعت کل یعنی 27مئی کو ہے، جس میں سینیئر وکیل اور سپریم کورٹ بار ایسوسی ایشن کے صدر دوشینت دوبے بحث کریں گے۔
جمعیت العلماء ہند نے کہا کہ مسلسل زہر افشانی کرکے اور جھوٹی خبریں چلاکر مسلمانوں کی شبیہ کو داغ دار اور ہندو۔مسلم کے درمیان نفرت پیدا کرکے دانستہ سازش کرنے والے ٹی وی چینلز اور پرنٹ میڈیا کے خلاف سپریم کورٹ میں کل یعنی 27 مئی کو چیف جسٹس کی سربراہی والی تین رکنی(چیف جسٹس ایس اے بوبڑے کے علاوہ جسٹس اے جے ایس بوپنا، جسٹس ہیری شی کیش رائے ) دوبارہ ویڈیو کانفرنسنگ کے ذریعے سماعت کرے گی۔
اس سے قبل 13 اپریل کی سماعت کے دوران ایڈوکیٹ اعجاز مقبول نے عدالت کے سامنے مختلف اخبارات کے تراشے اور ویڈیوز بطور ثبوت کے پیش کرتے ہوئے کہا تھا کہ کس طرح ٹی وی چینلز نے تبلیغی جماعت اور عام مسلمانوں کے خلاف محاذ کھول رکھا ہے اور ان کے خلاف منصوبہ بند طریقہ سے اشتعال انگیز رپورٹنگ ہورہی ہے۔