اجمیر میں بابا فریدالدینؒ کے چلہ کی تقریب

اجمیر شریف درگاہ میں صوفی حضرت بابا فرید الدین گنج شکر رحمۃ اللہ علیہ کا چلّا 72 گھنٹوں کے لئے کھولا گیا ہے۔

بھارت میں واحد بابا فرید الدین کا چلہ شریف حضرت خواجہ غریب نواز کی درگاہ میں واقع ہے۔ جہاں سالانہ محرم کی 4 تاریخ کو تین دنوں کے لیے خاص و عام زائرین کے لئے چلہ کھولا جاتا تھا۔

لیکن رواں برس کورونا وائرس کے سبب بابا صاحب کے چلے میں شرکت صرف درگاہ شریف کے خدام ہی کر سکیں گے۔ عام زائرین چلہ شریف کے دیدار سے فیضیاب نہیں ہو سکیں گے۔کیونکہ حکومت کی جانب سے جاری گائیڈ لائن میں کسی بھی مذہبی مقامات پر اجتماعیت کرنے پر اب بھی پابندیاں عائد ہیں۔

بابا فرید الدین کے چلہ شریف میں درگاہ کے خادم تمام عقیدت مندوں کے لیے خاص دعا کر رہے ہیں۔ اجمیر میں بابا فریدالدین کے چلہ میں ہر برس ملک و بیرون ملک سے زائرین کی بھیڑ امنڈ تی تھی یہاں تک کہ جو عقیدت مند پاک پٹن پاکستان نہیں جاسکتے ہیں وہ اجمیر میں بابا فرید کے چلہ پر حاضری دیتے تھے۔ لیکن افسوس رواں برس کورونا وائرس کے سبب کہیں سے بھی کسی زائرین کو آنے کی اجازت نہیں ہے۔