قومی دارالحکومت میں مسلم جماعتوں کی منعقدہ میٹنگ میں بابری کی بازیابی کے مطالبات نہیں دہرائے گئے، مشاورت کے صدر نوید حامد اور جمعیۃ اہل حدیث کے امیر مولانا اصغر نے ای ٹی وی بھارت کے اس سوال پر کہ مسلم جماعتیں بابری کی بازیابی کی جدو جہد سے دستبردار ہوگئیں؟ صرف اتنا کہا کہ عدالت کا جو فیصلہ آئے گا، وہ قابل قبول ہوگا۔
میٹنگ کے بعد مشاورت کے صدر نوید حامد اور جمعیۃ اہل حدیث کے امیر مولانا اصغر علی مہدی سلفی نے ای ٹی وی بھارت سے بات چیت کی۔
میٹنگ کے حوالے سے نوید حامد نے کہا کہ انھیں امید ہے کہ فیصلہ ان کے حق میں آئے گا اور وہ امن و امان برقرار رکھیں گے۔
فیصلہ حق میں نہیں آنے کی صورت میں کیا ہوگا؟ کے جواب میں کہا کہ ہمارے ہی حق میں فیصلہ آئے گا۔ نوید حامد نے یہ نہیں بتایا کہ بابری مسجد کی بازیابی کی اس طویل جد وجہد کا کیا ہوگا، جس کے لیے مسلم جماعتیں برسوں سے لڑتی رہی ہیں۔
یہی سوال جب جمیعت اہل حدیث کے امیر مولانا اصغر علی مہدی سلفی سے پوچھا گیا تو انہوں نے بھی گول مول جواب دیا۔ انہوں نے کہا کہ وہ امن و امان اور انصاف کی بات کر رہے ہیں، ہم ہر حال میں فیصلہ قبول کرنے کے لیے تیار ہیں۔