اگر انسان کے اندر حوصلہ اور جذبہ ہو تو انسان بڑی سے بڑی کامیابی حاصل کر سکتا ہے جی ہاں ہم بات کر رہے ہیں محمد زبیر کی۔
ریاست اتر پردیش کے شہر مرادآباد کے رہنے والے محمد زبیر پیشے سے انورٹر کاریگر ہیں ایک ہاتھ کا پنجہ نہ ہوتے ہوئے بھی اپنا یہ کام بخوبی کرتے ہیں۔
زبیر کا کہنا ہے کی جن لوگوں کے ہاتھ پاؤں نہیں ہوتے ہیں یا کسی حادثے کا شکار ہو جاتے ہیں ان لوگوں کو یہ نہیں سوچنا چاہیے کہ ان کے ہاتھ پاؤں نہیں ہیں اگر انسان کے اندر حوصلہ اور جذبہ ہے تو ہر مشکل کام کو آسان کر سکتا ہے۔
محمد زبیر کو انورٹر کا کام کرتے ہوئے تقریبا دس سال ہو چکے ہیں اور وہ کسی کی دکان پر نوکری کرتے چلے آرہے ہیں دوکان سے جو تنخواہ ملتی ہے اسی سے ان کے اہل خانہ کا گزارا ہوتا ہے۔
مرکزی حکومت اور صوبائی حکومت معذوروں کے لیے تمام منصوبے چلا رہی ہیں لیکن آج تک ان منصوبوں کا فائدہ محمد زبیر کو نہیں مل سکا۔ محمد زبیر کی آنکھوں میں کسی بھی طرح کے منصوبے سے فائدہ حاصل کرنے کا انتظار ہمیشہ رہتا ہے، لیکن سرکار کے یہ منصوبے ہمیشہ کاغذوں تک ہی رہ جاتے ہیں اور حقدار کو ان منصوبوں کا فائدہ نہیں پہنچ پاتا۔
ان کی خواہش ہے کہ وہ خود کی دکان شروع کریں، لیکن اتنا سرمایہ نہیں ہے کہ وہ اپنی دکان شروع کر سکیں۔ یہ ایک مثال ہے محمد زبیر کے حوصلوں اور جذبوں کی ، ان کے حوصلوں اور جذبوں کو سلام۔
