این آر سی پر حکومت اپنا موقف واضح کرے: چدمبرم

کانگریس کے سینیئر رہنما اور سابق مرکزی وزیر پی چدمبرم نے کہا ہے کہ قومی شہریت رجسٹر (این آر سی) میں جن 19 لاکھ لوگوں کے نام نہیں ہیں ان کے بارے میں حکومت اپنا موقف واضح کرے۔

بدعنوانی کے الزام میں تہاڑ جیل میں بند چدمبرم کی طرف سے ان کے خاندان کے اراکین نے پیر کو ٹوئٹ کیا ”اگر بنگلہ دیش کو یقین دہانی کرائی ہے کہ این آر سی کے عمل سے اس پر کوئی اثر نہیں پڑے گا تو حکومت بتائے کہ انیس لاکھ لوگوں کے ساتھ وہ کیا سلوک کرے گی۔“

این آر سی پر حکومت اپنا موقف واضح کرے: چدمبرم

انہوں نے کہا کہ یہ سنگین مسئلہ ہے اور حکومت کو واضح کرنا چاہئے کہ شہریت کے سلسلے میں ثبوت پیش نہیں کر پانے کی وجہ سے این آر سی سے باہر ہوئے 19 لاکھ لوگ کب تک غیر یقینی کی حالت میں رہیں گے اور ان کے شہری حقوق سے انہیں کب تک محروم رکھا جائے گا۔

خیال رہے کہ گذشتہ ہفتہ چار دن کے بھارت کے دورے پر آئی بنگلہ دیش کی وزیر اعظم شیخ حسینہ نے کہا تھا کہ وزیر اعظم نریندر مودی نے انہیں یقین دہانی کرائی ہے کہ این آر سی کا بنگلہ دیش پر کوئی اثر نہیں ہوگا اور مودی کی اس یقین دہانی سے وہ مطمئن ہیں۔