گوا: آیوروید علاج سے کورونا مریضوں کی قوت مدافعت میں اضافہ

گوا کے وزیراعلیٰ پرمود ساونت نے کہا کہ گوا پہلی ایسی ریاست ہے جہاں کورونا وائرس کے مریضوں اور کورنٹائن افراد کا ایلوپیتھی اور آیوروید کے ذریعہ علاج کیا جارہا ہے۔

پرمود ساونت نے صحافیوں کو بتایا کہ ریاست میں کورونا وائرس کے متاثرین کےلیے ایلوپیتھی اور آیورید دونوں طرز علاج کو اپنایا جارہا ہے۔

انہوں نے کہا کہ آیوروید کے ذریعہ کورونا وائرس کو ختم نہیں کیا جاسکتا لیکن آیورود کے ذریعہ مریض کی قوت مدافعت کو بڑھایا جاسکتا ہے تاکہ اسے مرض سے لڑنے کے قابل بنایا جاسکے۔

وزیراعلیٰ جو خود بھی آیوروید کے ماہر ہیں نے کہا کہ ڈاکٹرس سے مشاورت کے بعد اس سلسلہ میں اقدامات کئے جائیں گے۔

ریاست میں کورونا سے متاثر افراد کی تعداد 7 ہے جبکہ ایک مریض صحت یاب ہوچکا ہے۔