حکومت زرعی قوانین کو واپس لے: غلام نبی آزاد

راجیہ سبھا میں اپوزیشن کے رہنما غلام نبی آزاد نے کہا کہ کچھ سینئر صحافیوں، رکن پارلیمنٹ ششی تھرور کے خلاف بغاوت کا مقدمہ درج کیا گیا ہے۔ جسے فوری طور پر واپس لیا جانا چاہیے۔

نئی دہلی: راجیہ سبھا میں اپوزیشن کے رہنما غلام نبی آزاد نے بدھ کو حکومت سے کسانوں سے لڑائی کا راستہ چھوڑ کر بات چیت سے مسئلے کو حل کرنے اور تینوں زرعی قوانین کو واپس لینے کا مطالبہ کیا۔

مسٹر آزاد نے صدرجمہوریہ کے خطاب پر شکریہ کی تجویز پر بحث میں حصہ لیتے ہوئے کہا کہ ان تینوں قانون کو بنانے سے پہلے سلیکٹ کمیٹی کے سامنے بھیجا گیا ہوتا تو تنازع کی صورتحال پیدا نہیں ہوتی۔

انہوں نے 26 جنوری کو لال قلعہ میں ہونے والے تشدد پر کہا کہ اس واقعے میں ملوث مجرموں کو سزا دی جانی چاہیے اور کسی بھی معاملے میں بے گناہ لوگوں کو ملوث کرنے کی کوشش نہیں کرنی چاہیے۔

انہوں نے کہا کہ 'اپوزیشن لال قلعے تشدد واقعے کی بھرپور مذمت کرتی ہے۔ انہوں نے اس واقعے کو جمہوریت اور امن و امان کے منافی قرار دیا۔'

انہوں نے کہا کہ کسی بھی حالت میں قومی پرچم کی توہین برداشت نہیں کی جائے گی۔'

انہوں نے کہا کہ کچھ سینئر صحافیوں، رکن پارلیمنٹ ششی تھرور کے خلاف بغاوت کا مقدمہ درج کیا گیا ہے۔ جسے فوری طور پر واپس لیا جانا چاہیے۔ انہوں نے سوال کیا کہ جو شخص وزیر مملکت برائے امور خارجہ تھا وہ غدار کیسے ہوسکتا ہے۔ مسٹر آزاد نے کہا کہ اس کیس میں ملوث کچھ ایڈیٹرز جمہوریت کو زندہ رکھنے میں اہم کردار ادا کرتے ہیں۔ حکومت کو بہت سے معاشی اور بہت سارے بڑے چیلنجوں کا سامنا ہے جن کا ازالہ کرنا ہوگا۔'

انہوں نے کہا کہ کسانوں کی جدوجہد برطانوی دور سے جاری ہے اور تمام حکومتوں کو کسان مخالف قوانین کو واپس لینا ہوگا۔ انہوں نے کسان تحریک کے دوران ہلاک ہونے والے 175 کسانوں کو خراج عقیدت پیش کیا اور کہا کہ کسان سیکڑوں برسوں سے جدوجہد کر رہے ہیں۔

بحث میں حصہ لیتے ہوئے جنتا دل یونائیٹڈ کے رام چندر پرساد سنگھ نے کہا کہ 'کانگریس زرعی قوانین کا غلط موازنہ کررہی ہے۔ یہ قوانین لگان وصولی کی نہیں بلکہ کسانوں کی آمدنی میں اضافے کے لیے ہے۔

انہوں نے کہا کہ منڈی واقعی کرپشن کا گڑھ بن چکی ہے۔ مارکٹ کے نائب صدر کے عہدے کے لیے بہت بڑی بڑی سفارشات آتی ہیں۔ منڈیوں میں کسانوں کا استحصال کیا جارہا ہے۔ ختم ہونے والی منڈیوں کے فوائد کا ذکر کرتے ہوئے انہوں نے کہا کہ نالندہ سے پھل اور سبزیاں اور دودھ کی پیداوار کولکاتہ اور رانچی بھیجا جارہا ہے۔

مسٹر سنگھ نے کہا کہ کسانوں کو کانٹریکٹ فارمنگ میں فائدہ ہوگا۔ اب بھی ملک میں غیر رسمی معاہدوں کے ذریعہ کاشتکاری کی جارہی ہے۔ بٹائی پر کھیتی دراصل معاہدہ کے تحت کھیتی ہے۔ کانٹریکٹ کاشتکاری سے کسانوں کی آمدنی میں اضافہ ہوگا۔

انہوں نے کہا کہ 'ضروری اجناس ایکٹ 1955 میں بنایا گیا تھا جب ملک میں غذائی بحران تھا، لیکن اب حالات بدل چکے ہیں۔ ملک میں اشیائے خوردونوش کی زائد پیداوار ہے۔'

ان کے اسٹوریج کے لیے جگہ کی ضرورت ہے۔ ان قوانین سے کسانوں کی پیداوار کو ذخیرہ کرنے میں معاون ثابت ہوگی۔ انہوں نے کسان لیڈروں پر ہٹ دھرمی دکھانے کا الزام عائد کرتے ہوئے کہا کہ 'حکومت قوانین پر بات کرنے کے لیے تیار ہے۔ مسائل کو حل کرنے کے لیے رابطہ اور بات چیت ضروری ہیں۔'

انہوں نے حکومت کی کاوشوں اور کورونا وبا سے نمٹنے میں سائنسدانوں کی سخت محنت کی تعریف کی۔

مارکسی کمیونسٹ پارٹی کے الامرم کریم نے شکریہ کی تحریک کی مخالفت کرتے ہوئے کہا کہ اس میں عام آدمی کے لیے کچھ نہیں کہا گیا ہے۔ انہوں نے حکومت پر سماج کو تقسیم کرنے کا الزام عائد کرتے ہوئے کہا کہ' پورے ملک میں کسان زرعی قوانین کے خلاف سراپا احتجاج ہیں۔ حکومت کو اس طرف دھیان دینا چاہیے۔'

انہوں نے کہا کہ 'حکومت معاشی اصلاحات کے نام پر غریبوں کی رقم سرمایہ داروں کے حوالے کر رہی ہے۔ حکومت کے اقدامات کی وجہ سے ملک میں بے روزگاری میں اضافہ ہورہا ہے۔'

انہوں نے کہا کہ ملک میں افراط زر اپنے عروج پر ہے۔ ملک میں ڈیزل اور پیٹرول پر دنیا میں سب سے زیادہ ٹیکس ہے۔ جبکہ بحث نامکمل رہی۔

یواین آئی