'آزادی خود انحصاری سے منسلک ہے'

نائب صدر نے کہا کہ آج 8 اگست، بھارتی تاریخ کا ایک اہم دن ہے، اسی دن 1942 میں مہاتما گاندھی کی قیادت میں ملک نے انگریزوں کو بھارت چھوڑ نے دھمکی دی تھی۔

نائب صدر وینکیا نائیڈو نے نوجوانوں کی صلاحیتوں پر اعتماد کرنے اور انھیں مواقع فراہم کرنے پر زور دیتے ہوئے سنیچر کے روز کہا کہ ملک کی آزادی مکمل طور پر خود انحصاری سے منسلک ہے۔

مسٹر نائیڈو نے یہاں ایک پیغام میں کہا 'انگریزوں کے خلاف جدوجہد کرنے میں 8 اگست کی تاریخ کو خصوصی اہمیت حاصل ہے۔ ہمیں اس موقع پر آزادی کے لئے اپنی جانوں کا نذرانہ پیش کرنے والے سبھی مجاہدین آزادی کوسلام کرنا چاہئے'۔

انہوں نے کہا 'آج 8 اگست، بھارتی تاریخ کا ایک اہم دن ہے، اسی دن 1942 میں مہاتما گاندھی کی قیادت میں ملک نے انگریزوں کو بھارت چھوڑ نے دھمکی دی تھی۔ معاشرے کے ہر طبقے نے اس تحریک میں حصہ لیا اور ملک کی آزادی کے عظیم مقصد کے حصول کے لئے بھر پور کوششیں کیں'۔

بھارت چھوڑو تحریک کو اگست تحریک کے نام سے بھی جانا جاتا ہے، مہاتما گاندھی کی جانب سے 8 اگست 1942 کو آل انڈیا کانگریس کمیٹی کے بامبے سیشن میں اس تحریک کا اعلان کیا گیا تھا۔

اس سے پہلے کانگریس ورکنگ کمیٹی کی جانب سے 14 جولائی 1942 کو ایک قرارداد پاس کی گئی تھی، جس میں برٹش حکومت سے مکمل آزادی کی بات کہی گئی۔

بھارت چھوڑو تحریک کی مخالفت بھی ہوئی، ہندو مہاسبھا کی جانب سے کھلے عام اس تحریک کا بائیکاٹ کیا گیا۔