آگرہ میں کورونا وائرس سے متاثرہ خاتون کے کنبے پر ایف آئی آر درج

آگرہ ضلع کے کینٹ رویلے کالونی کے ایک کنبے پر ڈی ایم کے حکم کے بعد صدر تھانے میں ایک ایف آئی آر درج کر لی گئی ہے۔

آگرہ کے صدر تھانہ حلقہ میں کورونا سے متاثر ایک خاتون کے کنبے پر ایف آئی آر درج ہو گئی ہے۔ کنبے پر کورونا وائرس سے متاثر خاتون کی جانکاری چھپانے کا الزام ہے۔ متاثرہ خاتون کی ایک ماہ قبل ہی شادی ہوئی تھی اور شادی کے بعد وہ ہنیمون منانے اپنے شوہر کے ساتھ اٹلی گئی تھی لیکن جب وہ اٹلی سے واپس اپنے شوہر کے ساتھ بنگلورو آئی تو اس کا شوہر کورونا سے متاثر پایا گیا تھا۔

خاتون شوہر کو بنگلورو میں چھوڑ کر اپنے والد کے گھر آگرہ چلی آئی تھی لیکن اس کی جانکاری انتظامیہ کو نہیں دی گئی۔ بعد میں جب اس خاتون کے جانچ کی رپورٹ میں اس کے متاثر ہونے کا پتہ چلا تب انتظامیہ نے علاقے میں سینیٹائزر کا نظم کیا اور ضروری کاروائی پوری کی تاکہ قریب کے لوگوں کو اس وبا سے محفوظ رکھا جا سکے۔