ویسٹ انڈیز کے خلاف میچ کے بعد انٹرویو میں ہاشم آملہ نے کہا کہ روزہ صلاحیتوں میں نکھار کے حوالے سے مدد گار ثابت ہوتا ہے، انہوں نے کہا کہ انہیں ماہ رمضان کا پورا سال انتظار رہتا ہے کیونکہ اُن کو مطابق روزے اُنہیں جسمانی اور ذہنی مضبوطی فراہم کرتے ہیں۔
بحیثیت اوپنر ہاشم آملہ کی حالیہ کارکردگی زیادہ متاثر کن نہیں تھی، تاہم ورلڈ کپ وارم اپ میچوں میں لگاتار دو نصف سنچریاں داغ کر انہوں نے اپنی فارم میں واپسی کے اشارے دے دیے ہیں ۔
اپنی ٹیم کے سب سے سینئر کھلاڑی ہونے کی حیثیت سے ان کے کندھوں پر بھاری ذمہ داری عائد ہوتی ہے۔یاد رہے ورلڈ کپ 2019 کا آغاز ماہ رمضان میں ہو رہا ہے اور ہاشم آملہ اپنی جسمانی اور ذہنی فٹنس کا راز رمضان کو قرار دیتے ہیں۔
ہاشم آملہ نے 2012میں انگلینڈ کے دورے کے دوران اوول کے میدان میں جنوبی افریقہ کی تاریخ کا سب سے بڑا ٹیسٹ سکور 311 رنز بنایا تھا۔انہوں نے اب تک اپنے کیریئرمیں 174 ایک روزہ میچ کھیلے ہیں جن میں 27 سنچریوں کی مدد سے 49 رنز کی اوسط سے 7910 رنز اسکور کئے ہیں۔