'لڑکیوں کے بغیر معاشرے کا تصور ناممکن'

بانڈی پورہ کی معروف خاتون سماجی کارکن نازیہ حرہ نے بچیوں کی اہمیت اور معاشرے میں ان کا کردار کے حوالے سے گفتگو کرتے ہوئے کہا کہ کہ لڑکیاں معاشرے کا ایک ایسا اہم ترین جز ہیں، جس کے بغیر دنیا کا تصور ہی ممکن نہیں۔

شمالی کشمیر کے ضلع بانڈی پورہ کے نائدکھے علاقے میں بچیوں کی اہمیت کے بارے میں عوام کو حساس بنانے کے لئے ایک بیداری پروگرام کا انعقاد کیا گیا - اس پروگرام کا انعقاد گرلز مڈل اسکول نائدکھے سوناواری اور فوج نے مشترکہ طور پر کیا تھا-

اس پروگرام میں مختلف اسکولی طلباء نے بچیوں کی اہمیت اور انہیں تحفظ فراہم کرنے کے حوالے سے تقریر کی- پروگرام میں گرلز مڈل اسکول نائدکھے کے استاد، فوج کے کئ افسران، علاقے کے معزز شہریوں کے علاوہ اسکول کی طالبات موجود تھیں۔

اس موقع پر مختلف مقررین نے کہا کہ خواتین کو معاشرے میں ان کی اہمیت اور کردار کا احساس ہونا چاہئے۔ انہوں نے کہا جن لڑکیوں نے زندگی کے مختلف شعبوں میں کامیابی حاصل کی ہے انہیں سفیر کی حیثیت سے کام کرنا چاہئے، تاکہ وہ دوسری لڑکیوں کو اپنی صلاحیتوں کو مناسب طریقے سے بروئے کار لانے کے لئے رہنمائی کرسکیں۔

بانڈی پورہ کی معروف خاتون سماجی کارکن نازیہ حرہ نے بچیوں کی اہمیت اور معاشرے میں ان کا کردار کے حوالے سے گفتگو کرتے ہوئے کہا کہ کہ لڑکیاں معاشرے کا ایک ایسا اہم ترین جز ہیں، جس کے بغیر دنیا کا تصور ہی ممکن نہیں۔

انہوں نے اس بات پر زور دیا کہ 'خواتین کو اگر بااختیار بنانا ہے تو بچیوں کی دیکھ بھال کرنا ہماری اجتماعی ذمہ داری ہے۔ ایک عورت معاشرے کے تعلقات کو ہم آہنگ اور مضبوط بنانے میں کلیدی کردار ادا کرتی ہے اور خواتین کو تحفظ بخشنا اور انہیں یکساں حقوق فراہم کرنا معاشرے کا اولین اور بنیادی فریضہ ہے'۔

ان کے علاوہ مختلف اسکولی طلباء اور فوج کے 13 راشٹریہ رائفلز کے متعلقہ میجر کھیرا سنگھ نے بھی لڑکیوں کے یکساں حقوق اور تحفظ کے حوالے سے خطاب کیا۔