ڈاکٹر تارا شویتہ آریہ نے طلبا کو مستقبل کے تئیں مفید مشورے دیے

'مسز انڈیا روبرو' کا خطاب حاصل کرنے والی مشہور ماہر امراض چشم ڈاکٹر تارا شویتہ آریہ کا ڈی پی ایم آئی کشن گنج میں پرزور استقبال کیا گیا۔ جہاں انھوں نے طلبا کو اپنے مفید مشوروں سے نوازا۔

ڈی پی ایم آئی یعنی دہلی پارامیڈیکل مینجمنٹ اینڈ انسٹی ٹیوٹ (کشن گنج) میں تارا شویتہ کا نہ صرف گلدستہ سے استقبال کیا گیا بلکہ ثقافتی پروگرام کا انعقاد بھی کیا گیا۔

اس موقع پر تارا شویتہ آریہ نے بچوں کو تعلیم کی اہمیت و افادیت بتاتے ہوئے زندگی میں ہمیشہ آگے بڑھنے کی نصیحت کی۔

میڈیا سے گفتگو کے دوران انہوں نے کہا کہ کشن گنج اور آس پاس کے اضلاع میں پارامیڈیکل کے طلبہ و طالبات نہیں ملتے ہیں جس کی وجہ سے ہسپتالوں میں مختلف کام کے ماہرین باہر سے بلائے جاتے ہیں۔

جبکہ پارامیڈیکل کی تعلیم یہاں سے دیے جانے پر علاقے کے بچوں کو اپنے ہی علاقے میں روزگار مل جائیں گے۔ تارا شویتہ نے کہا آج ہسپتال کی کمی نہیں ہے اور نہ ہی ڈاکٹروں کی، اگر کمی ہے تو صلاحیت مند ہاسپیٹل اسٹاف کی جو آسانی سے دستیاب نہیں ہو پاتے ہیں۔

پارامیڈیکل کالج کے ڈائریکٹر تفہیم الرحمن نے کہا کہ ہماری کوشش اپنے علاقے کے نوجوان بچے و بچیوں کو تکنیکی تعلیم سے آراستہ کر بہتر مشتقبل دینا ہے۔

غور طلب ہے کہ ڈاکٹر تارا شویتہ آریہ ابھی حال ہی میں مسز انڈیا روبرو خطاب جیتنے کے بعد فلیپنس میں بھی اپنے حسن کا جلوہ بکھیر آئی ہیں۔

وہ فلیپنس میں مسز ٹورزم ورلڈ وائڈ، مسزٹورزم برانڈ امبیسڈر اور بیسٹ نیشنل کاسٹیوم کے ایوارڈ سے نوازی گئیں۔

تارا شویتہ آریہ ڈاکٹر کے علاوہ سیاسی اور سماجی کارکن بھی ہیں، وہ اسدالدین اویسی کی سیاسی پارٹی مجلس اتحاد المسلمین کی کشن گنج کی خاتون ضلع صدر بھی ہیں۔ مستقبل میں بہادر گنج اسمبلی حلقہ سے انتخاب بھی لڑنا چاہتی ہیں۔