شاہین باغ احتجاج: سپریم کورٹ میں سماعت ملتوی

سپریم کورٹ نے دہلی میں سنیچر کو ہونے والے اسمبلی انتخابات کے پیش نظر شاہین باغ معاملے کی سماعت پیر تک کے لیے ملتوی کردی ہے۔

واضح رہے کہ شہریت ترمیمی قانون کے خلاف دہلی کے شاہین باغ میں گزشتہ تقریبا دو ماہ سے احتجاج جاری ہے، خاص طور پر اس احتجاج کی قیادت خواتین کررہی ہیں۔

جسٹس سنجے کشن کول اور جسٹس کے ایم جوزف کی بینچ نے جمعہ کو وکیل امت ساہنی اور بھارتیہ جنتا پارٹی کے سابق رکن اسمبلی نند کشور گرگ کی عرضیوں کی سماعت یہ کہتے ہوئے پیر تک کے لیے ملتوی کردی کہ وہ اس معاملے کی سماعت اس دن زیادہ بہتر طریقے سے کرسکیں گے۔

بشکریہ ٹویٹر

گرگ کی جانب سے پیش وکیل ششانک دیو سودھی نے بینچ کے سامنے دلیل پیش کی کہ دہلی میں اسمبلی انتخابات کل ہونے ہیں، اس پر جسٹس کول نے کہا 'بالکل صحیح سمجھا آپ نے، اس لیے سماعت پیر کو ہی ہوگی'۔

اس سے قبل دہلی ہائی کورٹ نے احتجاج کے مقام کو خالی کرانے کا دہلی پولیس کو اختیار دیا تھا اور کہا تھا کہ 'وہ اپنے اختیارات کا استعمال کرتے ہوئے شہریوں کے حقوق کو مد نظر رکھ کر اس جگہ کو خالی کرائے۔'