تنخواہ نہ ملنے پر اسکول اسٹاف نے منیش سسودیا سے شکایت کی

دہلی سکھ گردوارہ پربندھک کمیٹی (ڈی ایس جی ایم سی) کے زیرانتظام چل رہے 'گرو ہرکشن پبلک اسکول' (جی ایچ پی ایس) لونی روڈ کے اسٹاف نے تنخواہ نہ ملنے اوردیگر مسائل کے سلسلے میں ڈپٹی وزیراعلی اور وزیر تعلیم منیش سسودیا کو خط تحریر کیا ہے۔

جی ایچ پی ایس اسٹاف ایسوسی ایشن نے خط لکھ کرمنیش سسودیا سے دہلی گردوارہ پربندھک کمیٹی کی جانب سے اسکول اسٹاف کو تنخواہ نہ دیئے جانے کی شکایت کی ہے۔

ایسوسی ایشن کے سکریٹری جنرل جسونت کور نے ڈپٹی سی ایم کو یہ بھی بتایا کہ دہلی گردوارہ کمیٹی ایجوکیشن انفورسمنٹ کے ذریعہ گذشتہ 17 اپریل کو پاس کئے گئے نوٹی فیکشن کی بھی پیروی نہیں کی جارہی ہے۔

اس نوٹی فیکیشن میں کمیٹی کو اسکول اسٹاف کو وقت پر تنخواہ دینے کے لئے کہا گیا تھا۔ ایسوسی ایشن نے اس خط میں الزام لگایا ہے کہ تعلیمی سیشن 2019-20 میں ایک استاد نے ایک بھی کلاس کے بچوں کو پڑھائے بغیر ہی پوری تنخواہ اسکول سے لی ہے کیونکہ وہ کمیٹی کے سینئر عہدیدار ہیں۔